جہلم پولیس کی فوری کارروائی، گمشدہ بچی کو 15 منٹ میں تلاش کر کے لواحقین سے ملا دیا

جہلم: تھانہ کالا گجراں کے علاقہ میں گمشدہ بچی کو پولیس نے بروقت کارروائی کرتے ہوئے محض 15 منٹ کے اندر بحفاظت تلاش کر کے لواحقین کے حوالے کر دیا۔

ترجمان جہلم پولیس کے مطابق ایمرجنسی ہیلپ لائن 15 پر گمشدہ بچی کے حوالے سے کال موصول ہوئی، جس پر کالا گجراں پولیس نے فوری رسپانس دیتے ہوئے ٹیم کو موقع پر روانہ کیا۔ پولیس نے پیشہ ورانہ مہارت اور بروقت اقدامات کے ذریعے قلیل وقت میں بچی کو تلاش کر لیا۔

پولیس کے مطابق بچی کو بحفاظت اس کے اہل خانہ کے حوالے کر دیا گیا، جس پر لواحقین نے پولیس کی فوری اور مؤثر کارروائی کو سراہتے ہوئے شکریہ ادا کیا۔

ڈی پی او جہلم شفیق احمد چوہدری کا کہنا ہے کہ شہریوں کے جان و مال کا تحفظ پولیس کی اولین ذمہ داری ہے اور اس سلسلے میں کسی قسم کی غفلت برداشت نہیں کی جائے گی۔