جہلم میں رمضان پیکیج کے لیے مستحق خاندانوں کی رجسٹریشن جاری

جہلم: وزیر اعلیٰ پنجاب مریم نواز شریف کی ہدایت پر رمضان پیکیج کے لیے مستحق خاندانوں کی رجسٹریشن کا عمل 10 فروری تک بلا تعطل جاری رہے گا۔ میونسپل کمیٹیوں سمیت ضلع بھر کی تمام یونین کونسلز میں مستحق خاندانوں کی خواتین اور افراد دفتری اوقات میں اپنے شناختی کارڈ کے ذریعے اندراج کروا رہے ہیں۔

ایڈیشنل ڈپٹی کمشنر/ایڈمنسٹریٹر میونسپل کمیٹی صباء سحر نے میڈیا نمائندگان سے گفتگو کرتے ہوئے بتایا کہ رمضان ریلیف پیکیج کے تحت مستحق خاندانوں کی رجسٹریشن کا عمل نہ صرف شہر بلکہ ہر یونین کونسل میں بھرپور طریقے سے جاری ہے۔ سینکڑوں مستحق خاندانوں کی رجسٹریشن مکمل کر لی گئی ہے جبکہ مزید خاندانوں کا اندراج بھی تیزی سے کیا جا رہا ہے۔

صباء سحر کا کہنا تھا کہ رجسٹریشن کے عمل کی نگرانی ڈپٹی ڈائریکٹر لوکل گورنمنٹ کر رہے ہیں تاکہ یہ یقینی بنایا جا سکے کہ مستحق افراد کو رمضان ریلیف پیکیج سے بھرپور فائدہ پہنچے۔ انہوں نے عوام سے اپیل کی کہ جو بھی افراد اس پیکیج کے لیے اہل ہیں، وہ دفتری اوقات میں اپنا شناختی کارڈ لے کر قریبی یونین کونسل یا متعلقہ دفتر میں رجسٹریشن کرائیں۔

مزید برآں حکومت کی جانب سے رمضان المبارک میں مستحق خاندانوں کو خصوصی ریلیف فراہم کرنے کے لیے مختلف اقدامات کیے جا رہے ہیں تاکہ کمزور طبقے کو مہنگائی کے اثرات سے بچایا جا سکے۔