ڈپٹی کمشنر جہلم میر رضا اوزگن کی پرائس کنٹرول کمیٹی کو کارکردگی بہتر بنانے کی ہدایت
جہلم: ڈپٹی کمشنر جہلم میر رضا اوزگن نے پرائس کنٹرول کمیٹی کی کارکردگی پر عدم اطمینان کا اظہار کرتے ہوئے فوری طور پر اس میں بہتری لانے کی ہدایت کی ہے۔
ڈپٹی کمشنر نے پرائس کنٹرول کمیٹی کے اجلاس میں واضح کیا کہ شہریوں کو گرانفروشی سے نجات دلانا اور مقررہ سرکاری نرخوں پر اشیائے ضروریہ کی دستیابی یقینی بنانا انتظامیہ کی اولین ترجیح ہے۔
انہوں نے کہا کہ مارکیٹوں کی چیکنگ کو تیز کیا جائے اور ذخیرہ اندوزی میں ملوث عناصر کے خلاف بغیر کسی رعایت کے سخت قانونی کارروائی عمل میں لائی جائے۔
میر رضا اوزگن نے کمیٹی کے افسران و اہلکاروں کو ہدایت کی کہ وہ اپنی ذمہ داریاں مزید فعال طریقے سے نبھائیں اور یہ یقینی بنائیں کہ تمام ضروری اشیاء، خصوصاً سبزیاں، پھل اور دالیں، حکومتی نوٹیفکیشن کے مطابق فروخت ہوں۔
ڈپٹی کمشنر نے واضح کیا کہ کارکردگی میں کسی بھی قسم کی سستی یا کوتاہی برداشت نہیں کی جائے گی اور کمیٹی کے افسران و اہلکاروں کو روزانہ کی بنیاد پر بازاروں میں کارروائیاں کرنے کا حکم دیا گیا تاکہ عوام کو فوری ریلیف فراہم کیا جا سکے۔
