پنڈدادنخان میں پولیس نے جوئے کی بازی الٹ دی، 7 قمار باز رنگے ہاتھوں گرفتار

پنڈدادنخان: تھانہ للِہ پولیس کی بڑی کارروائی، قماربازی میں ملوث 7 ملزمان کو گرفتار کر کے نقدی، موبائل فونز اور آلات قمار بازی برآمد کر لئے۔

تفصیلات کے مطابق جہلم کی تحصیل پنڈدادنخان میں تھانہ للِہ پولیس نے قمار بازی کے خلاف بڑی کارروائی کرتے ہوئے 7 ملزمان کو رنگے ہاتھوں گرفتار کر لیا۔ گرفتار افراد کے قبضے سے داؤ پر لگی رقم، موبائل فونز اور قماربازی میں استعمال ہونے والے آلات برآمد کر لیے گئے۔

ایس ایچ او تھانہ للِہ اور ان کی ٹیم نے کامیاب کارروائی کے دوران محمد بشیر، سفیر ریاض، رستم خان، عنصر اقبال، شوکت عباس، محمد عرفان اور محمد ممتاز کو گرفتار کیا۔ پولیس کے مطابق ملزمان تاش کے پتوں پر جوا کھیل رہے تھے۔

کارروائی کے دوران ملزمان کے قبضے سے داؤ پر لگی رقم 45,220 روپے، 4 عدد قیمتی موبائل فونز جن کی مالیت تقریباً 75,000 روپے بتائی گئی ہے، جبکہ قماربازی میں استعمال ہونے والے دیگر آلات بھی برآمد کیے گئے۔ جوئے کا مجموعی تخمینہ 1,20,220 روپے لگایا گیا ہے۔

پولیس نے ملزمان کے خلاف انسدادِ قمار بازی ایکٹ کے تحت مقدمہ درج کر کے مزید قانونی کارروائی کا آغاز کر دیا ہے۔ تھانہ للِہ پولیس کا کہنا ہے کہ جرائم پیشہ عناصر کے خلاف بلاامتیاز کارروائیاں جاری رہیں گی تاکہ معاشرتی برائیوں کا قلع قمع کیا جا سکے۔