جہلم میں شہید پولیس ہیڈ کانسٹیبل محمد فاروق کی اکیسویں برسی عقیدت و احترام سے منائی گئی
جہلم پولیس نے شہید ہیڈ کانسٹیبل محمد فاروق کی اکیسویں برسی عقیدت و احترام کے ساتھ منائی۔ اس موقع پر پولیس افسران نے شہید کی قبر پر حاضری دی، پھولوں کی چادر چڑھائی، فاتحہ خوانی کی اور ان کے درجات کی بلندی کے لیے خصوصی دعا کی۔
ترجمان جہلم پولیس کے مطابق ڈی ایس پی سٹی سرکل محمد اکرم سمیت دیگر پولیس افسران نے شہید کی لحد پر حاضری دی، جبکہ پولیس کے چاق و چوبند دستے نے شہید کو سلامی پیش کی۔
پولیس کے مطابق شہید ہیڈ کانسٹیبل محمد فاروق نے ایک اشتہاری ملزم کی گرفتاری کے لیے پولیس پارٹی کے ہمراہ چھاپہ مار کارروائی کے دوران فرض کی ادائیگی کرتے ہوئے جامِ شہادت نوش کیا تھا، جب ملزم نے پولیس پارٹی پر فائرنگ کر دی تھی۔
ڈی پی او جہلم شفیق احمد چوہدری نے اس موقع پر اپنے پیغام میں کہا کہ شہداء پولیس قوم کا قیمتی سرمایہ ہیں، جنہوں نے اپنے خون کا نذرانہ پیش کر کے ملک و ملت کے تحفظ کی عظیم مثال قائم کی۔ انہوں نے کہا کہ شہداء پولیس ہمارے محسن ہیں، جن کی بہادری، شجاعت اور قربانیاں ہمیشہ یاد رکھی جائیں گی۔
ڈی پی او نے مزید کہا کہ شہداء پولیس کی لازوال قربانیاں جہلم پولیس اور عوام پر قرض ہیں۔ انہوں نے اس عزم کا اعادہ کیا کہ محکمہ پولیس شہداء کے مشن کو جاری رکھے گا اور ان کے اہل خانہ کی ہر ممکن دیکھ بھال اپنی ذمہ داری سمجھتا ہے۔
انہوں نے کہا کہ شہداء محکمہ پولیس کا ہمیشہ قابلِ فخر حصہ رہیں گے اور ان کی قربانیوں کو کبھی فراموش نہیں کیا جائے گا۔
