جہلم میں جی ٹی روڈ پر تیز رفتار کار کی میاں بیوی کو ٹکر، خاتون جاں بحق، شوہر شدید زخمی

44

جہلم میں جی ٹی روڈ پر فوجی فاؤنڈیشن ہسپتال کے قریب تیز رفتار کار کی میاں بیوی کو ٹکر، خاتون جاں بحق جبکہ شوہر کو زخمی حالت میں ہسپتال منتقل کر دیا گیا۔

تفصیلات کے مطابق جہلم میں جی ٹی روڈ کے مقام پر فوجی فاؤنڈیشن ہسپتال کے قریب ایک تیز رفتار کار نے میاں بیوی کو ٹکر مار دی جس کے نتیجے میں دونوں شدید زخمی ہوگئے۔ حادثے کی اطلاع ملتے ہی ریسکیو 1122 کی ٹیم فوری طور پر موقع پر پہنچی اور زخمیوں کو ابتدائی طبی امداد فراہم کی۔

زخمی ہونے والے دونوں افراد کو فوری طور پر ڈی ایچ کیو ہسپتال جہلم منتقل کیا گیا، جہاں 60 سالہ خاتون زخمی شہناز بی بی زوجہ اعظم خان زخموں کی تاب نہ لا سکیں اور جان کی بازی ہار گئیں۔ 63 سالہ زخمی اعظم خان ولد سید محمد ہسپتال میں زیر علاج ہیں اور ان کی حالت تشویشناک بتائی جاتی ہے۔

حادثے کے بعد ریسکیو 1122 اور متعلقہ حکام نے جائے حادثہ کا معائنہ کیا جبکہ پولیس واقعے کی مزید تحقیقات میں مصروف ہے۔