جہلم پولیس کا ضلع بھر میں سپیشل سرچ آپریشنز اور ناکہ بندی، 403 افراد کی چیکنگ

جہلم: ڈی پی او جہلم طارق عزیز سندھو کی ہدایت پر ضلع بھر میں پولیس کا سپیشل سرچ آپریشنز اور ناکہ بندی کا سلسلہ جاری ہے۔

پولیس کی جانب سے 17 مختلف مقامات پر سرچ آپریشنز کیے گئے جن کے دوران 403 افراد کو چیک کیا گیا۔

یہ کارروائیاں دہشت گردوں، جرائم پیشہ عناصر کی سرکوبی اور اہم تنصیبات کی سیکیورٹی کو فول پروف بنانے کے لیے عمل میں لائی گئیں۔

سرچ آپریشنز کے دوران شہریوں کی پولیس ایپلیکیشن کے ذریعے ویری فکیشن بھی کی گئی جبکہ شہر کے داخلی و خارجی راستوں پر ناکہ بندی کے دوران سخت چیکنگ کی گئی۔

ڈی پی او جہلم طارق عزیز سندھو نے کہا کہ سرچ آپریشنز کا مقصد ناجائز اسلحہ و منشیات کی برآمدگی، مجرمان اشتہاریوں اور سماج دشمن عناصر کی گرفتاری ہے تاکہ شرپسند عناصر کو اپنے مذموم عزائم پر عمل پیرا ہونے سے روکا جا سکے۔