جہلم میں سیلابی ریلے میں بہنے والے پولیس کانسٹیبل حیدر کی لاش مل گئی

جہلم میں سیلابی ریلے میں بہنے والے پولیس کانسٹیبل حیدر کی لاش مل گئی ہے۔

تفصیلات کے مطابق گزشتہ روز جہلم میں فلیش فلڈ کے باعث ریسکیو کارروائی کے دوران سیلابی ریلے کی نذر ہونے والے پولیس کانسٹیبل حیدر کی لاش ریسکیو ٹیموں نے تلاش کر لی ہے۔ ریسکیو ذرائع کے مطابق کانسٹیبل کی میت کو ڈی ایچ کیو ہسپتال جہلم منتقل کیا جا رہا ہے۔

یاد رہے کہ یہ افسوسناک واقعہ اس وقت پیش آیا جب پنڈدادنخان کے علاقے پنڈی سیدپور کے رہائشی جہلم پولیس کے نوجوان اور بہادر کانسٹیبل حیدر نے تھانہ چوٹالہ کے علاقے میں سیلابی پانی میں پھنسے شہریوں کی جان بچانے کے لیے اپنی جان خطرے میں ڈالی۔ دورانِ کارروائی وہ خود تیز بہاؤ میں بہہ گئے اور لاپتہ ہو گئے تھے۔

ڈی پی او جہلم طارق عزیز نے اس موقع پر اپنے بیان میں کہا کہ "کانسٹیبل حیدر کی قربانی ایک قابل فخر مثال ہے، انہوں نے اپنی جان کا نذرانہ دے کر انسانیت کی خدمت کی۔ ان کی بہادری اور قربانی کو ہمیشہ یاد رکھا جائے گا۔”