ممکنہ سیلابی صورتحال سے نمٹنے کے لیے تمام محکمے مکمل تیار رہیں، ڈپٹی کمشنر میر رضا اوزگن
جہلم: ڈپٹی کمشنر جہلم میر رضا اوزگن کی زیرِ صدارت ایک اہم جائزہ اجلاس منعقد ہوا، جس میں ضلع بھر میں جاری ترقیاتی و انتظامی امور، مون سون کے دوران نکاسیٔ آب کے انتظامات، ممکنہ سیلابی صورتحال سے نمٹنے کی تیاریوں اور مختلف سرکاری پروگراموں کی پیش رفت کا تفصیلی جائزہ لیا گیا۔
اجلاس میں پلس پروگرام کی پیش رفت، گرین پراپرٹی سرٹیفکیٹس کے اجرا، کھاتہ و انتقالات سے متعلق امور، مون سون کے دوران نکاسیٔ آب کے انتظامات، ممکنہ سیلابی صورتحال سے نمٹنے کے لیے پیشگی اقدامات، محکمہ واسا جہلم کی کارکردگی، بیوٹیفکیشن اسکیم، ستھرا پنجاب پروگرام، پرائس کنٹرول، کلیدی کارکردگی اشاریوں اور ریونیو کورٹ مینجمنٹ سسٹم کے تحت زیرِ سماعت مقدمات کی پیش رفت پر تفصیلی بریفنگ دی گئی۔
ڈپٹی کمشنر میر رضا اوزگن نے متعلقہ افسران کو ہدایت کی کہ مون سون کے دوران نکاسیٔ آب کا نظام ہر وقت فعال رکھا جائے اور نشیبی علاقوں، نالہ گہان، نالہ بنہاں سمیت دیگر حساس مقامات کی مسلسل نگرانی کی جائے تاکہ کسی بھی ہنگامی صورتحال میں فوری اور مؤثر کارروائی یقینی بنائی جا سکے۔
انہوں نے مزید ہدایت کی کہ ممکنہ سیلابی صورتحال سے نمٹنے کے لیے تمام متعلقہ محکمے مکمل تیاری برقرار رکھیں، باہمی رابطہ مؤثر بنائیں اور شہریوں کو بروقت سہولیات کی فراہمی یقینی بنائیں۔
اجلاس سے خطاب کرتے ہوئے ڈپٹی کمشنر نے اس بات پر بھی زور دیا کہ ضلع بھر میں جاری تمام ترقیاتی منصوبوں، سرکاری پروگراموں اور عوامی فلاح سے متعلق اقدامات کو مقررہ اہداف کے مطابق بروقت مکمل کیا جائے۔ انہوں نے متعلقہ محکموں کو ہدایت کی کہ ادارہ جاتی ہم آہنگی کو مزید بہتر بنایا جائے اور عوامی مسائل کے فوری اور مؤثر حل کے لیے تمام دستیاب وسائل بروئے کار لائے جائیں۔
