دارالعرفان منارہ میں سالانہ روحانی تربیتی اجتماع 6 جون سے 12 جولائی منعقد ہو گا
چکوال: سلسلہ عالیہ نقشبندیہ اویسیہ کے روحانی مرکز دارالعرفان منارہ ضلع چکوال میں سالانہ روحانی تربیتی اجتماع 6 جون سے 12 جولائی تک منعقد ہو رہا ہے۔ یہ روحانی مرکز کلر کہار انٹرچینج سے تقریباً 20 کلومیٹر جنوب میں واقع ہے، جہاں ملک و بیرونِ ملک سے ہزاروں افراد روحانی تربیت، اصلاحِ نفس اور معرفتِ الٰہی کے حصول کے لیے شرکت کرتے ہیں۔
اجتماع شیخ المکرم امیر عبدالقدیر اعوان کی سرپرستی میں منعقد کیا جا رہا ہے، جہاں روزانہ تربیتی نشستیں، ذکر و اذکار، دینی و روحانی تعلیمات اور صحبتِ شیخ کا اہتمام کیا جاتا ہے۔
اس موقع پر صوفیاء کرام کی صحبت کی اہمیت کو اجاگر کرتے ہوئے کہا گیا ہے کہ انسان صرف جسم نہیں بلکہ روح اور بدن کا مجموعہ ہے۔ جس طرح جسمانی نشوونما کے لیے مادی غذا ضروری ہے، اسی طرح روح کی بالیدگی کے لیے اللہ تعالیٰ کا ذکر، تلاوتِ قرآن، درود شریف، نماز اور دیگر عبادات ناگزیر ہیں۔
اجتماع کے منتظمین کے مطابق موجودہ دور کے فتنوں، ذہنی انتشار اور روحانی بے سکونی سے نجات حاصل کرنے کے لیے اللہ تعالیٰ سے تعلق مضبوط کرنا وقت کی اہم ضرورت ہے۔ اسی مقصد کے تحت دارالعرفان منارہ میں سالانہ اجتماع کا انعقاد کیا جاتا ہے تاکہ لوگوں کو اپنی حقیقت، مقصدِ حیات اور راہِ نجات کا شعور حاصل ہو سکے۔
اجتماع میں شریک ہونے والے احباب کو روزانہ امیر عبدالقدیر اعوان کے خطابات سننے، روحانی تربیت حاصل کرنے اور اصلاحِ قلب و باطن کے مواقع میسر آئیں گے۔
منتظمین نے عوام الناس کو اس روحانی اجتماع میں شرکت کی دعوت دیتے ہوئے کہا ہے کہ یہ محض ایک رسمی پروگرام نہیں بلکہ اپنی زندگی کو دینِ اسلام کی حقیقی روح کے مطابق ڈھالنے اور اللہ تعالیٰ سے تعلق مضبوط کرنے کا ایک سنہری موقع ہے۔
انہوں نے کہا کہ موجودہ دور میں روحانی تربیت اور صحبتِ اہلِ اللہ ایک عظیم نعمت ہے، لہٰذا اس بابرکت اجتماع سے بھرپور استفادہ حاصل کیا جائے اور اپنی زندگی میں مثبت تبدیلی لانے کی کوشش کی جائے۔
"یک زمانہ صحبت با اولیاء، بہتر از صد سالہ طاعت بے ریاء”
منتظمین کے مطابق یہ اجتماع ہر خاص و عام کے لیے کھلا ہے اور تمام احباب کو شرکت کی دعوت دی گئی ہے۔
