جہلم میں تین منشیات فروشوں کو جرم ثابت ہونے پر عمر قید و جرمانے کی سزا

جہلم میں تین منشیات فروشوں کو جرم ثابت ہونے پر عمر قید و جرمانے کی سزا سنا دی گئی۔

تفصیلات کے مطابق جہلم میں ایڈیشنل ڈسٹرکٹ اینڈ سیشن جج جہلم محمد سعید رفیق نے منشیات سمگلنگ کیس کا فیصلہ سنا دیا، جرم ثابت ہونے پر پشاور کے رہائشی تین مجرمان محمد رفیق، شیر علی اور محمد کاشف کو عمر قید اور ایک ایک لاکھ روپے جرمانہ کی سزا کا حکم سنایا گیا۔

پولیس ذرائع کے مطابق مجرمان پر تھانہ چوٹالہ میں جون 2021میں منشیات سمگلنگ کا مقدمہ درج ہوا تھا۔ مجرمان سے سرکاری نمبر پلیٹ والی گاڑی سے دس کلو سے زائد منشیات برآمد ہوئی تھی۔

پولیس نے شواہد جمع کر کے مقدمہ کا چالان عدالت میں پیش کیا اور موثر پیروی کی جس کے نتیجے میں عدالت نے قرار واقعی سزا سنائی۔

ڈی پی او جہلم ناصر محمود باجوہ نے اس کامیابی پر انویسٹی گیشن اور لیگل ٹیموں کو شاباش دی اور انہیں تعریفی سرٹیفکیٹ اور نقد انعام دینے کا اعلان کیا۔ انہوں نے کہا کہ منشیات فروش معاشرے کا ناسور ہیں اور ان کے خاتمے کے لئے بھرپور آپریشن جاری رہے گا۔