جہلم بار کا پاراچنار واقعے پر احتجاج، شہداء کیلئے دعائے مغفرت اور متاثرہ خاندانوں سے یکجہتی کا اظہار
جہلم: ڈسٹرکٹ بار ایسوی ایشن جہلم نے پاراچنار کے دلخراش اور افسوسناک واقعے کے خلاف بھرپور احتجاج کیا۔ احتجاجی اجلاس میں وکلاء برادری نے اس سانحہ پر شدید غم و غصے کا اظہار کرتے ہوئے اسے انسانیت سوز اور ناقابل معافی جرم قرار دیا۔
وکلاء نے حکومت سے پرزور مطالبہ کیا کہ واقعے میں ملوث درندہ صفت ملزمان کو جلد از جلد گرفتار کر کے قانون کے کٹہرے میں لایا جائے اور انہیں سخت سے سخت سزا دی جائے۔
وکلاء نے کہا کہ اس واقعے کی جتنی بھی مذمت کی جائے وہ ناکافی ہے کیونکہ یہ واقعہ نہ صرف متاثرہ خاندانوں بلکہ پورے ملک کے لیے ایک صدمے کا باعث بنا ہے۔
وکلاء نے حکومت اور قانون نافذ کرنے والے اداروں پر زور دیا کہ وہ اپنی ذمہ داری پوری کریں اور متاثرین کو انصاف دلائیں۔ احتجاج کے دوران شرکاء نے پلے کارڈز اور بینرز اٹھا رکھے تھے جن پر انصاف کے مطالبے اور واقعے کی مذمت کے نعرے درج تھے۔ وکلاء نے کہا کہ ایسے واقعات کو روکنے کے لیے مؤثر قوانین اور ان پر سختی سے عمل درآمد ضروری ہے۔
احتجاج کے اختتام پر شہداء کے لیے دعائے مغفرت کی گئی اور متاثرہ خاندانوں سے یکجہتی کا اظہار کیا گیا۔ وکلاء برادری نے یہ عزم کیا کہ وہ انصاف کے قیام کے لیے اپنی جدوجہد جاری رکھیں گے اور ہر سطح پر مظلوموں کی حمایت کریں گے۔
ہمیں فالو کریں
