پی ٹی آئی کے مزید 11 کارکن ڈسٹرکٹ جیل جہلم سے رہا

جہلم: ڈسٹرکٹ جیل جہلم میں 26 نومبر کو مبینہ طور پر قانون و امان کی خلاف ورزی کے الزام میں 700 سے زائد دیگر افراد کے ساتھ قید کیے گئے 11 پی ٹی آئی کارکنان کو گزشتہ رات رہا کر دیا گیا۔

ان کارکنان کی رہائی اسلام آباد کی انسداد دہشت گردی عدالت (اے ٹی سی) سے ضمانت منظور ہونے کے بعد عمل میں آئی۔

ذرائع کے مطابق اسلام آباد کی انسداد دہشت گردی عدالت کی جانب سے ضمانت کی منظوری کے بعد 192 پی ٹی آئی کارکنان کو رہا کیا جا چکا ہے۔ جہلم جیل کے سپرنٹنڈنٹ سید حسن مجتبیٰ نے بھی گزشتہ روز انسداد دہشت گردی عدالت کی جانب سے ضمانت ملنے کے بعد 11 مزید پی ٹی آئی کارکنان کی رہائی کی تصدیق کی ہے۔

ذرائع نے مزید بتایا کہ 26 نومبر کے احتجاج کے بعد مبینہ طور پر پرتشدد واقعات میں ملوث 710 پی ٹی آئی کارکنان کو ڈسٹرکٹ جیل جہلم منتقل کیا گیا تھا، جن میں سے 507 کارکنان ابھی تک جیل میں قید ہیں اور ان کی ضمانت کی درخواستوں کی منظوری کا انتظار کیا جا رہا ہے۔