جہلم: سوہاوہ میں سی سی ڈی اور مسلح ملزمان کے درمیان مبینہ مقابلے میں اجرتی قاتل مارا گیا

سوہاوہ/ جہلم: سوہاوہ میں کاؤنٹر کرائم ڈپارٹمنٹ اور خطرناک اشتہاری ملزمان کے درمیان مبینہ مقابلہ ہوا، جس کے نتیجے میں اجرتی قاتل ہلاک ہو گیا۔

ترجمان سی سی ڈی جہلم کے مطابق جہلم کی تحصیل سوہاوہ میں سی سی ڈی ٹیم کو اطلاع ملی کہ تھانہ سوہاوہ کے علاقے ٹنڈوئی پل کے قریب تین مسلح افراد واردات کی نیت سے موجود ہیں۔ سی سی ڈی ٹیم نے فوری طور پر موقع پر پہنچ کر کارروائی کی، لیکن ملزمان نے پولیس کو دیکھتے ہی فائرنگ شروع کر دی۔

مسلح ملزمان فائرنگ کرتے ہوئے قریبی جنگل کی طرف فرار ہونے لگے۔ سی سی ڈی ٹیم نے حفاظتی اقدامات کے تحت جوابی فائرنگ کرتے ہوئے ان کا تعاقب کیا۔ فائرنگ کے تبادلے کے دوران اجرتی قاتل کامران شوکت ولد شوکت علی ساکن گلیانہ گوجرخان اپنے ہی ساتھیوں کی گولیوں کا نشانہ بن گیا،ملزم کو زخمی حالت میں گرفتار کر کے اس کے قبضے سے اسلحہ بھی برآمد کر لیا گیا۔

زخمی ملزم کو فوری طور پر تحصیل ہیڈ کوارٹر ہسپتال سوہاوہ منتقل کیا گیا، جہاں وہ زخموں کی تاب نہ لاتے ہوئے دم توڑ گیا۔ اس کے دیگر دو مسلح ساتھی اندھیرے اور گھنے جنگل کا فائدہ اٹھاتے ہوئے فرار ہو گئے۔

ترجمان سی سی ڈی کے مطابق ہلاک ہونے والا کامران شوکت ایک اجرتی قاتل تھا اور اس پر قتل، اغواء، موٹر سائیکل چوری سمیت متعدد سنگین مقدمات درج تھے، جن میں وہ چالان بھی ہو چکا تھا۔

ترجمان کا مزید کہنا ہے کہ فرار ہونے والے ملزمان کی تلاش کے لیے علاقے میں سرچ آپریشن جاری ہے۔