جہلم میں مفت پبلک ٹرانسپورٹ کی سہولت ختم، اب کرایہ دینا ہوگا

جہلم: وزیراعلیٰ پنجاب کی جانب سے عوام کو دی جانے والی مفت پبلک ٹرانسپورٹ سہولت اچانک ختم کر دی گئی ہے، جس کے بعد جہلم سمیت پنجاب بھر میں مختلف عوامی ٹرانسپورٹ سروسز پر دوبارہ کرایوں کا اطلاق کر دیا گیا ہے۔ فیصلے کے بعد شہریوں نے مختلف ردعمل کا اظہار کرتے ہوئے اسے مہنگائی کے دور میں ایک اضافی مالی بوجھ قرار دیا ہے۔

جہلم میں گرین بس سروس پر آج 13 جون سے باقاعدہ کرایہ وصولی دوبارہ شروع کر دی گئی ہے۔ مسافروں کو سفر کے لیے مقررہ کرایہ ادا کرنا ہوگا جبکہ مفت سفری سہولت کا خاتمہ کر دیا گیا ہے۔

ذرائع کے مطابق حکومت پنجاب نے پیٹرولیم مصنوعات کی قیمتوں میں اضافے کے باعث عوام کو ریلیف فراہم کرنے کے لیے عارضی طور پر کرایہ وصولی معطل کر دی تھی تاکہ شہریوں کو سفری اخراجات میں سہولت فراہم کی جا سکے۔ تاہم حالیہ دنوں میں پیٹرولیم مصنوعات کی قیمتوں میں کمی کے بعد حکومت نے اس خصوصی رعایت کو ختم کرتے ہوئے کرایہ وصولی کا نظام دوبارہ بحال کر دیا ہے۔

شہریوں کا کہنا ہے کہ اگرچہ پٹرولیم مصنوعات کی قیمتوں میں کمی واقع ہوئی ہے، تاہم مجموعی طور پر مہنگائی اب بھی عام آدمی کے لیے ایک بڑا مسئلہ بنی ہوئی ہے۔ ایسے میں مفت سفری سہولت کے خاتمے سے روزانہ سفر کرنے والے طلبہ، ملازمین اور کم آمدن والے افراد کے اخراجات میں مزید اضافہ ہوگا۔

عوامی حلقوں نے حکومت سے مطالبہ کیا ہے کہ کم آمدن والے طبقے کو ریلیف فراہم کرنے کے لیے متبادل سہولیات یا خصوصی رعایتی پیکیجز متعارف کروائے جائیں تاکہ عوام پر بڑھتے ہوئے مالی دباؤ کو کم کیا جا سکے۔

دوسری جانب متعلقہ حکام کا مؤقف ہے کہ مفت سفری سہولت ایک عارضی ریلیف اقدام تھا جسے مخصوص حالات میں نافذ کیا گیا تھا، جبکہ موجودہ صورتحال کے پیش نظر ٹرانسپورٹ سروسز پر معمول کے مطابق کرایہ وصولی کا نظام دوبارہ بحال کر دیا گیا ہے۔