ایمان اور سود ایک ساتھ نہیں چل سکتے، حقیقی کامیابی اتباعِ رسول ﷺ میں ہے، امیر عبدالقدیر اعوان

امیر عبدالقدیر اعوان نے کہا ہے کہ ایمان اور سود آپس میں بالمقابل ہیں۔ اگر کوئی ایمان کا دعویٰ بھی کرے اور پھر سود کا لین دین بھی کرے تو انجام وہی ہوگا جو کفر کرنے والوں کا ہوا۔ دوزخ کی آگ کفر کرنے والوں کیلئے تیار کی گئی ہے۔ اللہ کے حبیب ﷺ کی اطاعت ہی دراصل اللہ کی اطاعت ہے۔

یہ باتیں امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان نے جمعۃ المبارک کے روز خطاب کرتے ہوئے کہیں۔ انہوں نے کہا کہ یہ خیال درست نہیں کہ صرف رکوع و سجود کے ذریعے جنت حاصل ہو جائے گی بلکہ جنت اللہ تعالیٰ کی رحمت سے عطا ہوگی۔ اللہ کریم نے ہمیں بے شمار نعمتوں سے نوازا ہے جن کا شکر ادا کرنا بھی ممکن نہیں، اس لیے انسان کو کبھی اپنی عبادات پر غرور نہیں کرنا چاہیے۔

انہوں نے کہا کہ ہمارا ایمان ہے کہ دنیا کی ہر چیز کو فنا ہے، اس لیے دنیاوی کامیابی بھی عارضی ہے۔ حقیقی فلاح اور کامیابی کی بنیاد اتباعِ محمد الرسول اللہ ﷺ ہے۔ دونوں جہانوں کی کامیابی اسی زندگی میں اللہ تعالیٰ کی مقرر کردہ حدود کے اندر رہتے ہوئے حاصل کی جا سکتی ہے۔

انہوں نے کہا کہ حدود اللہ سے تجاوز کر کے حقیقی فلاح حاصل نہیں ہو سکتی۔ دین اسلام انسان کو اعلیٰ اصول عطا کرتا ہے جبکہ ذاتی پسند و ناپسند اور خواہشاتِ نفس صرف فساد کو جنم دیتی ہیں۔ سکون اور ٹھہراؤ صرف دین اسلام کے احکامات کے مطابق زندگی گزارنے میں ہے کیونکہ اسلام دینِ فطرت ہے۔

امیر عبدالقدیر اعوان نے مزید کہا کہ قرآن کریم حقیقی کامیابی کو جنت قرار دیتا ہے۔ انسان کی زندگی تیزی سے اپنے اختتام کی جانب بڑھ رہی ہے اور یہی وقت آخرت سنوارنے کا ہے۔ انہوں نے کہا کہ موت آنے سے پہلے انسان کو اپنی اصلاح کرنی چاہیے، نیک اعمال اختیار کرنے چاہئیں اور زندگی کو حسرت پر ختم نہیں ہونے دینا چاہیے۔

انہوں نے کہا کہ نورِ ایمان وہ عظیم دولت ہے جس سے دنیا و آخرت کی کامیابی نصیب ہوتی ہے۔ بخشش ہمارے اعمال سے نہیں بلکہ اللہ تعالیٰ کی رحمت سے ہوگی، تاہم ہر عمل کو نبی کریم ﷺ کی اتباع کے مطابق بنانا ضروری ہے۔

آخر میں انہوں نے ملکی سلامتی، استحکام اور بقا کیلئے خصوصی اجتماعی دعا بھی فرمائی۔