شہریوں کو معیاری صحت سہولیات کی فراہمی ضلعی انتظامیہ کی اولین ترجیح ہے، ڈپٹی کمشنر میر رضا اوزگن
جہلم: ڈپٹی کمشنر جہلم میر رضا اوزگن نے ڈسٹرکٹ ہیڈکوارٹر (ڈی ایچ کیو) ہسپتال جہلم کا دورہ کیا اور ہسپتال میں مریضوں کو فراہم کی جانے والی طبی سہولیات، انتظامی امور اور مجموعی کارکردگی کا تفصیلی جائزہ لیا۔
دورے کے دوران ڈپٹی کمشنر نے ہسپتال کے مختلف وارڈز، ایمرجنسی، او پی ڈی، ادویات کی دستیابی، صفائی ستھرائی کے انتظامات اور مریضوں کو فراہم کی جانے والی سہولیات کا معائنہ کیا۔ انہوں نے مختلف شعبہ جات کا دورہ کرتے ہوئے طبی عملے کی کارکردگی اور انتظامات کا بھی جائزہ لیا۔
میر رضا اوزگن نے زیر علاج مریضوں اور ان کے لواحقین سے ملاقات کی اور انہیں فراہم کی جانے والی طبی سہولیات، ادویات کی دستیابی اور علاج معالجے کے معیار کے بارے میں دریافت کیا۔ انہوں نے مریضوں کے مسائل اور تجاویز بھی سنیں اور متعلقہ حکام کو ضروری ہدایات جاری کیں۔
اس موقع پر ڈپٹی کمشنر نے ہسپتال انتظامیہ کو ہدایت کی کہ مریضوں کو بروقت، معیاری اور بہترین طبی سہولیات کی فراہمی ہر صورت یقینی بنائی جائے۔ انہوں نے کہا کہ صفائی ستھرائی کے اعلیٰ معیار کو برقرار رکھنا اور مریضوں کے لیے سازگار ماحول فراہم کرنا ہسپتال انتظامیہ کی اہم ذمہ داری ہے۔
انہوں نے مزید ہدایت کی کہ ادویات کی دستیابی، طبی عملے کی حاضری اور مختلف شعبہ جات کی کارکردگی کی باقاعدگی سے نگرانی کی جائے تاکہ عوام کو بلا تعطل معیاری طبی خدمات فراہم کی جا سکیں۔ انہوں نے اس امر پر زور دیا کہ کسی بھی قسم کی غفلت یا کوتاہی برداشت نہیں کی جائے گی۔
ڈپٹی کمشنر میر رضا اوزگن نے کہا کہ شہریوں کو معیاری صحت سہولیات کی فراہمی ضلعی انتظامیہ کی اولین ترجیح ہے اور اس مقصد کے حصول کے لیے تمام دستیاب وسائل بروئے کار لائے جا رہے ہیں۔ انہوں نے ہسپتال انتظامیہ کو ہدایت کی کہ عوامی خدمت کے جذبے کے تحت اپنے فرائض انجام دیں اور مریضوں کو ہر ممکن سہولت فراہم کریں۔
انہوں نے اس عزم کا اظہار کیا کہ ضلعی انتظامیہ صحت کے شعبے میں بہتری، مریضوں کو بہتر طبی سہولیات کی فراہمی اور سرکاری ہسپتالوں کی کارکردگی کو مزید مؤثر بنانے کے لیے مسلسل اقدامات جاری رکھے گی۔
