پنجاب یونیورسٹی جہلم کیمپس میں زیرِ تعلیم طلباء کو آمد و رفت میں شدید مشکلات کا سامنا
جہلم: پنجاب یونیورسٹی جہلم کیمپس میں زیرِ تعلیم طلبہ و طالبات کو روزانہ آمد و رفت میں شدید مشکلات کا سامنا ہے۔
ٹرانسپورٹ کی سہولت نہ ہونے کے باعث طلبہ کو مالی اور جسمانی پریشانیوں کا سامنا کرنا پڑ رہا ہے، جس سے ان کی تعلیمی سرگرمیاں متاثر ہو رہی ہیں۔
بہت سے طلبہ و طالبات دور دراز علاقوں سے جہلم کیمپس میں تعلیم حاصل کرنے آتے ہیں، مگر مناسب سفری سہولیات میسر نہ ہونے کے باعث انہیں روزانہ مشکلات پیش آتی ہیں۔
والدین نے حکومتِ پنجاب سے اپیل کی ہے کہ طلبہ و طالبات کے لیے باقاعدہ بس سروس فراہم کی جائے تاکہ وہ اپنی تعلیم پر بہتر طور پر توجہ دے سکیں۔
شہریوں اور والدین کا کہنا ہے کہ اگر پنجاب یونیورسٹی جہلم کیمپس کے لیے بسوں کا انتظام کیا جائے تو نہ صرف طلبہ کا قیمتی وقت بچے گا بلکہ ان کے تعلیمی معیار میں بھی بہتری آئے گی۔
پنجاب یونیورسٹی جہلم کیمپس کے طلبہ و طالبات نے وزیرِاعلیٰ پنجاب مریم نواز شریف سے پرزور مطالبہ کیا ہے کہ وہ ذاتی دلچسپی لیتے ہوئے کیمپس کے لیے بس سروس کا فوری اجرا یقینی بنائیں تاکہ طلبہ کو سفری سہولتوں میں درپیش مشکلات کا خاتمہ ہو سکے۔
