امریکہ ایران مذاکرات میں پاکستان کا کردار قابل تحسین ہیں، چوہدری راشد گھرمالہ
جہلم: چوہدری راشد گھرمالہ نے کہا ہے کہ وزیر اعظم شہباز شریف اور فیلڈ مارشل سید عاصم منیر کی اعلیٰ سفارتی اور عسکری حکمت عملی کے باعث امریکہ اور ایران مذاکرات کی میز پر آئے، جس کے مثبت اثرات مشرق وسطیٰ سمیت عالمی معیشت پر مرتب ہوئے ہیں۔
پاکستان مسلم لیگ (ن) تحصیل جہلم کے صدر چوہدری راشد گھرمالہ نے اپنے ایک بیان میں کہا کہ اس پیش رفت سے دونوں ممالک کے درمیان کشیدگی میں نمایاں کمی آئی ہے اور یہ پاکستان کی عالمی سطح پر باوقار حیثیت کا واضح ثبوت ہے، جسے دنیا بھر میں سراہا جا رہا ہے۔
انہوں نے مزید کہا کہ موجودہ قیادت کی بروقت اور دانشمندانہ پالیسیوں کے باعث پاکستان نہ صرف خطے بلکہ عالمی سفارت کاری میں بھی ایک اہم مقام حاصل کر چکا ہے۔
چوہدری راشد گھرمالہ نے کہا کہ قیامِ امن کے لیے پاکستان کا کردار انتہائی اہم ہے اور اس کے مثبت اثرات آنے والے دنوں میں مزید نمایاں ہوں گے۔ ان کا کہنا تھا کہ تاریخ گواہ ہے کہ جنگیں مسائل کو حل کرنے کے بجائے انہیں مزید پیچیدہ بناتی ہیں، جبکہ مذاکرات ہی پائیدار امن کی بنیاد فراہم کرتے ہیں۔
انہوں نے امید ظاہر کی کہ امریکہ اور ایران کے درمیان مذاکرات کا سلسلہ جاری رہے گا، جس سے غلط فہمیاں ختم ہوں گی، باہمی اعتماد کو فروغ ملے گا اور خطے میں کشیدگی کم ہو کر دنیا میں دیرپا امن کی راہیں ہموار ہوں گی۔
