ضلع جہلم میں شدید گرمی کی لہر، شہری گھروں میں محصور
جہلم: ضلع جہلم سمیت پنجاب کے مختلف علاقوں میں قیامت خیز گرمی اور حبس کی شدید لہر جاری ہے، جس کے باعث روزمرہ زندگی بری طرح مفلوج ہو کر رہ گئی ہے۔
سورج آگ برسا رہا ہے اور درجہ حرارت خطرناک حدوں کو چھو رہا ہے، جس کے نتیجے میں شہری گھروں میں محصور ہو کر رہ گئے ہیں۔ شہر کے بازار، گلیاں، چوک اور چوراہے دن بھر سنسان دکھائی دیے، جہاں معمول کے دنوں میں چہل پہل نظر آتی تھی وہاں آج ویرانی کا سماں تھا۔
شدید گرمی کے ساتھ ساتھ بجلی کی بار بار ٹرپنگ نے عوام کی مشکلات میں مزید اضافہ کر دیا ہے، جس کے باعث شہری ذہنی اذیت کا شکار ہیں۔ شدید گرمی کی اس لہر نے کاروباری سرگرمیوں کو بھی بُری طرح متاثر کیا ہے، دکانیں خالی اور گاہک نایاب ہو چکے ہیں۔
ٹھنڈے مقامات کی تلاش میں عوام نے مساجد کا رخ کر لیا ہے، جہاں بارانِ رحمت کے لئے اجتماعی دعاؤں کا سلسلہ مسلسل جاری ہے۔ مختلف علاقوں کی مساجد میں خطباء و ائمہ کی جانب سے اللہ کے حضور خصوصی دعائیں مانگی جا رہی ہیں کہ گرمی کی شدت میں کمی ہو اور بارش برسائی جائے تاکہ اہل علاقہ کو راحت میسر آئے۔
