جلال پور کینال منصوبہ زراعت کی ترقی کے لیے گیم چینجر ثابت ہوگا، راجہ حسن رضا خان

پنڈدادنخان: ڈائریکٹر زراعت اصلاح آبپاشی راولپنڈی ڈویژن راجہ حسن رضا خان نے جہلم کی تحصیل پنڈدادنخان میں جلال پور کینال کے تحت کمانڈ ایریا ڈویلپمنٹ کی جاری سکیموں کا معائنہ کیا۔

معائنے کے دوران ڈائریکٹر زراعت راجہ حسن رضا خان نے کہا کہ جلال پور کینال منصوبہ اس خطے کے لیے گیم چینجر ثابت ہوگا، جو زراعت میں انقلابی تبدیلیاں لانے کا باعث بنے گا۔ کمانڈ ایریا ڈویلپمنٹ کے تحت مختلف سکیموں پر کام تیزی سے جاری ہے اور اب تک 30 ہزار ایکڑ رقبہ ہموار کیا جا چکا ہے۔

انہوں نے مزید کہا کہ جلال پور نہر کے پانی سے سیراب ہونے والا یہ رقبہ کاشتکاروں کو منافع بخش فصلیں اگانے کے قابل بنائے گا، جو نہ صرف زراعت کو ترقی دے گا بلکہ کسانوں کی معیشت کو بھی مضبوط کرے گا۔

ڈائریکٹر زراعت نے بتایا کہ منصوبے کے تحت 650 ایکڑ رقبے پر ہائی ایفیشینسی اریگیشن سسٹم اور سپرنکلر نظام آبپاشی کی تنصیب مکمل کر لی گئی ہے، جس سے آبپاشی کے عمل میں نمایاں بہتری آئے گی۔