نوجوان کھلاڑیوں کی حوصلہ افزائی اور بہت مواقع فراہم کرنا حکومت کی اولین ترجیح ہے، مشیر صحت
جہلم: مشیر صحت پنجاب میجر جنرل (ر) ڈاکٹر اظہر کیانی نے کہا ہے کہ نوجوان کھلاڑیوں کی حوصلہ افزائی اور ان کے لیے بہتر مواقع فراہم کرنا پنجاب حکومت کی اولین ترجیح ہے کیونکہ کھیل نوجوانوں کی جسمانی صحت کے ساتھ ساتھ ذہنی مضبوطی کا بھی ذریعہ بنتے ہیں۔
وہ ضلع کونسل ہال جہلم میں مریم نواز سپورٹس میلہ کے سلسلے میں ضلع جہلم سے راولپنڈی میں ہونے والے ڈویژنل سطح کے مقابلوں کے لیے روانہ ہونے والے کھلاڑیوں میں سپورٹس کٹس تقسیم کرنے کی تقریب سے خطاب کر رہے تھے۔ اس موقع پر ڈپٹی کمشنر جہلم میثم عباس، ڈسٹرکٹ سپورٹس آفیسر، اور کھلاڑیوں کی بڑی تعداد بھی موجود تھی۔
مشیر صحت ڈاکٹر اظہر کیانی نے کہا کہ وزیراعلیٰ پنجاب مریم نواز شریف نوجوانوں کی صلاحیتوں کو نکھارنے اور ان کے اندر چھپی توانائی کو مثبت سمت دینے کے لیے جامع اقدامات کر رہی ہیں۔ ان کا کہنا تھا کہ کھیلوں کے فروغ کے لیے ایسے اقدامات نوجوانوں کو آگے بڑھنے کے مواقع فراہم کرتے ہیں۔
ڈپٹی کمشنر جہلم میثم عباس نے اس موقع پر کہا کہ یہ جہلم کے لیے فخر کی بات ہے کہ بڑی تعداد میں نوجوان کھلاڑی راولپنڈی میں ہونے والے مقابلوں کے لیے منتخب ہوئے ہیں۔ انہوں نے نوجوانوں پر زور دیا کہ وہ اپنی کارکردگی سے نہ صرف ضلع کا نام روشن کریں بلکہ مستقبل کے بڑے مقابلوں کے لیے بھی خود کو تیار کریں۔
تقریب کے اختتام پر کرکٹ، ہاکی، بیڈمنٹن، کراٹے، ایتھلیٹکس اور دیگر کھیلوں میں نمایاں کارکردگی دکھانے والے نوجوان کھلاڑیوں میں سپورٹس کٹس تقسیم کی گئیں اور ضلعی انتظامیہ کی جانب سے ان کی بھرپور حوصلہ افزائی کی گئی۔
