تحصیل سطح پر بہتر کارکردگی سے ہی اضلاع کی مجموعی بہتری ممکن ہے، کمشنر انجینئر عامر خٹک
جہلم: کمشنر راولپنڈی ڈویژن انجینئر عامر خٹک کی زیرِ صدارت ڈویژنل کوآرڈینیشن کمیٹی کا اہم اجلاس منعقد ہوا۔
اجلاس میں تمام ڈپٹی کمشنرز اور اسسٹنٹ کمشنرز نے بذریعہ ویڈیو لنک شرکت کی۔ اجلاس میں اس امر پر خصوصی زور دیا گیا کہ تحصیل کی سطح پر انتظامی بہتری پورے ضلع کی مجموعی کارکردگی میں نمایاں بہتری کا باعث بنتی ہے۔
کمشنر راولپنڈی ڈویژن نے تمام اسسٹنٹ کمشنرز کو ہدایت کی کہ وہ اپنی تحصیلوں میں متعلقہ محکموں کی مؤثر قیادت کریں اور انتظامی نظم و ضبط کو مزید بہتر بنائیں۔ انہوں نے واضح کیا کہ جب تحصیل سطح پر صحت، تعلیم، صفائی ستھرائی اور ترقیاتی منصوبوں کے اہداف (کے پی آئیز) حاصل کیے جائیں گے تو اس کے مثبت اثرات پورے ضلع کی کارکردگی پر مرتب ہوں گے۔
اجلاس کے دوران ڈپٹی کمشنر جہلم میر رضا اوزگن نے ضلع کی مختلف تحصیلوں میں جاری عوامی فلاحی منصوبوں پر تفصیلی بریفنگ دی۔ اس موقع پر انجینئر عامر خٹک نے ہدایت کی کہ اسسٹنٹ کمشنرز فیلڈ میں متحرک کردار ادا کریں اور اپنی موجودگی کو یقینی بنا کر حکومتی پالیسیوں کے ثمرات براہِ راست عوام تک پہنچائیں۔
انہوں نے اس بات پر بھی زور دیا کہ نچلی سطح پر بہتر طرزِ حکمرانی ہی عوامی مسائل کے مؤثر حل کی ضمانت ہے۔ کمشنر راولپنڈی ڈویژن نے ڈپٹی کمشنرز کو اضلاع اور اسسٹنٹ کمشنرز کو تحصیل سطح پر جاری تمام منصوبوں کی کڑی نگرانی اور معیار برقرار رکھنے کے احکامات بھی جاری کیے۔
