ڈی پی او جہلم کا اردل روم، غفلت پر 5 اہلکاروں کی سروس ضبط، متعدد کو سزائیں
جہلم: ڈی پی او جہلم شفیق احمد چوہدری نے پولیس لائنز جہلم میں اردل روم کا انعقاد کیا، جس میں پولیس افسران و اہلکاران پیش ہوئے اور ان کے خلاف جاری شوکاز نوٹسز پر سماعت کی گئی۔
ڈی پی او جہلم نے اردل روم کے دوران پیش ہونے والے افسران و اہلکاران کے مؤقف کو تفصیل سے سنا اور میرٹ پر احکامات جاری کیے۔ انہوں نے فرائض میں غفلت برتنے پر 5 پولیس اہلکاروں کی سروس ضبطگی، ایک اہلکار کو جرمانہ، ایک کو سنشور، 2 اہلکاروں کے شوکاز نوٹسز فائل جبکہ 4 اہلکاروں کو وارننگ کی سزائیں سنائیں۔
ڈی پی او جہلم شفیق احمد چوہدری کا کہنا تھا کہ نظم و ضبط اور پیشہ ورانہ ذمہ داریوں کی ادائیگی میں کسی قسم کی کوتاہی برداشت نہیں کی جائے گی۔ انہوں نے پولیس اہلکاروں کو ہدایت کی کہ وہ اپنے فرائض ایمانداری، فرض شناسی اور محنت کے ساتھ انجام دیں اور عوام کی خدمت کو اپنا شعار بنائیں۔
ڈی پی او کا مزید کہنا تھا کہ بہترین نظم و ضبط اور اعلیٰ تربیت ہی ایک اچھے پولیس افسر کی پہچان ہے جبکہ نااہل، کام چور اور بددیانت اہلکاروں کی محکمہ میں کوئی گنجائش نہیں۔
