جہلم شہر کی خوبصورتی اور تزین و آرائش کے لیے بھرپور شجرکاری کا سلسلہ جاری ہے، ڈپٹی کمشنر میثم عباس

جہلم شہر کی خوبصورتی، ماحولیاتی بہتری اور شہری فضا کو خوشگوار بنانے کے لیے بھرپور شجرکاری مہم جاری ہے۔ شہر کی تمام اہم شاہراہوں پر بیکار، غیر آباد اور گندگی سے آلودہ جگہوں کو گرین بیلٹس میں تبدیل کیا جا رہا ہے، جہاں اب خوشنما پھول اور سرسبز پودے شہر کی زینت بن چکے ہیں۔

یہ بات ڈپٹی کمشنر جہلم میثم عباس نے محکمہ جنگلات کے زیر اہتمام شجرکاری مہم کے دوران پودا لگانے کے موقع پر میڈیا سے گفتگو کرتے ہوئے کہی۔ انہوں نے کہا کہ یہ مہم نہ صرف شہر کو خوبصورت بنانے میں معاون ثابت ہو رہی ہے بلکہ درختوں کی شدید کمی کو پورا کرنے اور ماحولیاتی آلودگی کے خاتمے میں بھی اہم کردار ادا کر رہی ہے۔

محکمہ جنگلات کی جانب سے دی گئی بریفنگ میں ڈپٹی کمشنر کو بتایا گیا کہ موسمِ بہار کے آغاز سے اب تک ہزاروں کی تعداد میں پودے ضلع بھر کے مختلف مقامات پر لگائے جا چکے ہیں۔ خصوصاً ان جگہوں پر توجہ دی جا رہی ہے جہاں پہلے کچرے کے ڈھیر ہوا کرتے تھے۔

ڈی سی میثم عباس نے محکمہ جنگلات کی کاوشوں کو سراہتے ہوئے کہا کہ یہ محض درخت لگانے کی مہم نہیں بلکہ آنے والی نسلوں کے لیے ایک صاف، سرسبز اور صحت مند پاکستان کی بنیاد ہے۔ انہوں نے عوام سے اپیل کی کہ وہ اس مہم میں بڑھ چڑھ کر حصہ لیں اور لگائے گئے پودوں کی نگہداشت کو اپنی مشترکہ ذمہ داری سمجھیں۔

انہوں نے مزید کہا کہ "پودے لگانا کافی نہیں، ان کی آبیاری اور حفاظت ہمارا فرض ہے تاکہ ہم اپنے ماحول کو بہتر بنا سکیں اور موسمی تبدیلیوں کے خطرات سے نمٹ سکیں۔”