قدرتی آفات سے نمٹنے کیلئے ہر وقت تیار رہنا ضروری ہے، ڈپٹی کمشنر جہلم سیدہ رملہ علی

جہلم: قدرتی آفات سے نمٹنے کیلئے ہر وقت تیار رہنا ضروری ہے تاکہ کسی بھی ہنگامی صورتحال میں بروقت امدادی کارروائیوں کا سلسلہ شروع ہو سکے۔

ان خیالات کا اظہار ڈپٹی کمشنر جہلم سیدہ رملہ علی نے 8 اکتوبر 2005 کے زلزلے کے حوالے سے آگاہی واک کی قیادت کرتے ہوئے کہی۔ واک میں ریسکیو 1122، پی ڈی ایم اے، سول ڈیفنس اور تمام متعلقہ محکموں نے شرکت کی۔

ڈی سی جہلم سیدہ رملہ علی نے کہا کہ آج کے دن ہم زلزلہ 2005 کے تمام شہدا کے درجات کی بلندی اور مستقبل میں ایسے واقعات میں کم سے کم نقصانات بارے آگاہی کے لئے یہ واک کررہے ہیں۔ جس کا مقصد شہریوں میں کسی قسم کی قدرتی آفات جیسے زلزلے، سیلاب یا تخریب کاری کی صورت میں بچاؤ کا طریقہ کار واضح کرنا اور شہریوں کو اس حوالے سے آگاہی دینا ہے۔

آگاہی واک کے بعد ریسکیو 1122 اسٹیشن پر ہنگامی صورتحال سے نمٹنے کیلئے موک ایکسرسائز اور مظاہرہ کیا گیا۔ جس پر ڈی سی جہلم سیدہ رملہ علی نے ریسکیو جوانوں کی تیاریوں اور مشق پر اطمینان کا اظہار کیا۔