ہفتہ وار تعطیلات کے باعث اینٹی کرپشن آفس جہلم کی کارکردگی متاثر، درجنوں کیسز التواء کا شکار، شہریوں کی تشویش
جہلم: حکومت کی توانائی بچت پالیسی کے تحت نافذ ہفتہ وار تعطیلات کے باعث سرکل آفس اینٹی کرپشن جہلم کی کارکردگی متاثر ہونے لگی ہے، جس کے نتیجے میں درجنوں اہم کیسز التواء کا شکار ہو گئے ہیں اور انصاف کے منتظر سائلین شدید مایوسی کا شکار ہیں۔
رپورٹ کے مطابق جمعہ اور ہفتہ کی تعطیلات کے نفاذ کے بعد اینٹی کرپشن آفس میں جاری انکوائریز خصوصاً ہفتہ کے روز مکمل طور پر معطل ہو کر رہ گئی ہیں، جس کے باعث کرپشن کے خلاف کارروائیوں کی رفتار سست ہو گئی ہے اور کئی کیسز غیر ضروری تاخیر کا شکار ہیں۔
متاثرہ سائلین کا کہنا ہے کہ وہ طویل عرصے سے انصاف کے حصول کے لیے دفاتر کے چکر لگا رہے ہیں، تاہم تعطیلات کے باعث پیشرفت نہ ہونے کے برابر ہے۔ ان کا مؤقف ہے کہ اگر یہی صورتحال برقرار رہی تو بدعنوان عناصر کے خلاف کارروائیاں مزید تاخیر کا شکار ہو جائیں گی، جو انصاف کے تقاضوں کے منافی ہے۔
شہریوں نے ڈائریکٹر جنرل اینٹی کرپشن پنجاب سہیل ظفر چٹھہ سے مطالبہ کیا ہے کہ ہفتہ کے روز متاثر ہونے والی انکوائریز کو دیگر ورکنگ دنوں میں ترجیحی بنیادوں پر مکمل کیا جائے تاکہ کرپشن میں ملوث عناصر کو قانون کے کٹہرے میں لایا جا سکے اور عوام کا اعتماد بحال ہو۔
شہری حلقوں کا کہنا ہے کہ کرپشن جیسے سنگین مسئلے کے خاتمے کے لیے ضروری ہے کہ متعلقہ ادارے مکمل فعالیت کے ساتھ کام کریں، بصورت دیگر احتساب کا عمل کمزور پڑنے کا خدشہ ہے۔
عوامی و سماجی حلقوں نے صورتحال پر گہری تشویش کا اظہار کرتے ہوئے اعلیٰ حکام سے فوری نوٹس لینے کا مطالبہ کیا ہے تاکہ انصاف کی بروقت فراہمی یقینی بنائی جا سکے۔
