اسسٹنٹ کمشنر دینہ صفاء عابد نے ڈی مارٹ دینہ میں قائم سستا رمضان سٹال کا افتتاح کر دیا

دینہ: اسسٹنٹ کمشنر دینہ صفاء عابد نے ڈی مارٹ جی ٹی روڈ دینہ میں قائم سستا رمضان سٹال کا افتتاح کر دیا۔

اس موقع پر ڈی مارٹ کے اونر امجد محمود سیٹھی، دینہ پریس کلب کے صدر سید توقیر آصف شاہ، حاجی اظہر چوہدری، رضوان سیٹھی، اقبال خان، سہیل انجم قریشی، احمد ندیم سمیت دیگر معزز شخصیات بھی موجود تھیں، جنہوں نے اسسٹنٹ کمشنر کا پرتپاک استقبال کیا۔

افتتاحی تقریب کے دوران اسسٹنٹ کمشنر صفاء عابد نے ربن کاٹ کر سستا رمضان سٹال کا باضابطہ افتتاح کیا اور وہاں موجود اشیائے خورد و نوش کے نرخوں کا جائزہ لیا۔

انہوں نے اشیاء کی قیمتوں اور معیار کو چیک کرتے ہوئے اطمینان کا اظہار کیا اور کہا کہ ڈی مارٹ میں عوام کو رمضان المبارک کے مقدس مہینے میں بازار کے مقابلے میں انتہائی کم نرخوں پر اشیاء فراہم کی جا رہی ہیں، جو کہ ایک خوش آئند اقدام ہے۔

انہوں نے میڈیا سے گفتگو کرتے ہوئے کہا کہ سستا رمضان سٹال عوام کی سہولت کے لیے ایک بہترین اقدام ہے، جہاں معیاری اشیاء کم قیمت پر دستیاب ہیں۔ رمضان کے مقدس مہینے میں عوام کو ریلیف دینا حکومت اور نجی کاروباری برادری دونوں کی ذمہ داری ہے، اور ڈی مارٹ انتظامیہ کا یہ اقدام قابل تحسین ہے۔

اس موقع پر ڈی مارٹ کے اونر امجد محمود سیٹھی نے کہا کہ ہر سال کی طرح اس سال بھی رمضان المبارک میں عوام کے لیے خصوصی رمضان سٹال لگایا گیا ہے، جہاں اشیاء بازار کی نسبت کم نرخوں پر فراہم کی جا رہی ہیں تاکہ شہریوں کو زیادہ سے زیادہ سہولت دی جا سکے۔

تقریب کے اختتام پر اسسٹنٹ کمشنر صفاء عابد نے ڈی مارٹ انتظامیہ کی کاوشوں کو سراہتے ہوئے امید ظاہر کی کہ رمضان المبارک کے دوران عوام کو مزید ریلیف فراہم کرنے کے لیے ایسے اقدامات جاری رہیں گے۔