جہلم میں اولڈ جی ٹی روڈ پر جگہ جگہ غیر قانونی یو ٹرن، جان لیوا حادثات میں روز بروز اضافہ
جہلم شہر کے مصروف ترین علاقے اولڈ جی ٹی روڈ، جادہ تا شاندار چوک پر جگہ جگہ قائم غیر قانونی یوٹرن جان لیوا حادثات کا سبب بننے لگے، روزانہ پیش آنے والے ٹریفک حادثات معمول بن چکے ہیں۔
میونسپل کمیٹی جہلم اور پروونشل ہائی وے ڈیپارٹمنٹ کی عدم دلچسپی اور ناقص نگرانی کے باعث اولڈ جی ٹی روڈ پر متعدد غیر منظور شدہ یوٹرن قائم ہو چکے ہیں۔ ان یوٹرنز کے باعث اندرون شہر ٹریفک کے بہاؤ میں رکاوٹ اور حادثات میں نمایاں اضافہ دیکھنے میں آیا ہے۔
شہریوں کا کہنا ہے کہ ان یوٹرنز کی وجہ سے اکثر گاڑیاں اچانک سڑک کا رخ بدلتی ہیں اور پیچھے سے آنے والی تیز رفتار ٹریفک کے ساتھ ٹکرا جاتی ہیں، جس کے نتیجے میں نہ صرف گاڑیاں تباہ ہوتی ہیں بلکہ قیمتی جانیں بھی ضائع ہو رہی ہیں۔
رپورٹ کے مطابق گزشتہ چند ماہ کے دوران درجنوں افراد ان حادثات کا شکار ہو کر یا تو جان کی بازی ہار چکے ہیں یا عمر بھر کی معذوری کا سامنا کر رہے ہیں۔
شہری علاقہ مکینوں کا کہنا ہے کہ انہوں نے کئی بار زبانی و تحریری طور پر میونسپل کمیٹی اور دیگر متعلقہ محکموں کو ان غیر قانونی یوٹرنز کے بارے میں آگاہ کیا، لیکن تاحال کسی قسم کا کوئی عملی اقدام نہیں اٹھایا گیا۔
شہریوں نے وزیراعلیٰ پنجاب، چیف سیکرٹری، اور سیکرٹری ہائی وے ڈیپارٹمنٹ سے اپیل کی ہے کہ فوری طور پر اولڈ جی ٹی روڈ پر قائم ان غیر قانونی یوٹرنز کو ختم کیا جائے اور حادثات کی روک تھام کے لیے ٹریفک کے نظام کو بہتر بنایا جائے تاکہ شہریوں کی جان و مال کا تحفظ یقینی بنایا جا سکے۔
