منگلا ڈیم ٹوٹنے کی جعلی ویڈیو وائرل کرنے والے ٹک ٹاکر کے خلاف مقدمہ درج

جہلم: منگلا ڈیم ٹوٹنے کی جعلی ویڈیو وائرل کرنے والے ٹک ٹاکر کے خلاف مقدمہ درج کرلیا گیا ، جس میں کہا ہے کہ ٹک ٹاک پر جھوٹی ویڈیو پوسٹ کرکے عوام میں خوف و ہراس پھیلایا گیا۔

جہلم پولیس نے منگلا ڈیم ٹوٹنے کی جعلی ویڈیو سوشل میڈیا پر وائرل کرنے والے ٹک ٹاکر کے خلاف مقدمہ درج کرلیا۔

ایف آئی آر کے مطابق ملزم کی شناخت ملک نبیل کے نام سے ہوئی ہے، جس نے ٹک ٹاک پر جھوٹی ویڈیو پوسٹ کرکے عوام میں خوف و ہراس پھیلایا۔

مقدمہ ایس آئی کی مدعیت میں درج کیا گیا ہے اور ملزم کے خلاف پیکا ایکٹ کے تحت کارروائی عمل میں لائی گئی ہے۔

پولیس حکام کا کہنا ہے کہ جھوٹی اور اشتعال انگیز ویڈیوز شیئر کرنے والوں کے خلاف سخت کارروائی کی جائے گی تاکہ عوام کو گمراہ اور خوفزدہ کرنے کے عمل کی حوصلہ شکنی کی جاسکے۔