جہلم میں سبز نمبر پلیٹ والی گاڑیوں کے ذریعے جرائم میں اضافہ، پولیس کی خاموشی پر عوام میں تشویش
جہلم شہر اور گردونواح میں سبز نمبر پلیٹ والی گاڑیوں کے ذریعے جرائم میں اضافے کی اطلاعات موصول ہو رہی ہیں، لیکن پولیس ان غیرنمونہ نمبر پلیٹس والی گاڑیوں کے خلاف کارروائی سے گریزاں نظر آتی ہے۔
ذرائع کے مطابق جہلم شہر میں متعدد گاڑیاں ایسی دیکھی گئی ہیں جن پر سبز نمبر پلیٹ لگی ہوتی ہے اور ان پر مختلف سرکاری محکموں کے نام درج ہوتے ہیں۔ زیادہ تر جرائم میں استعمال ہونے والی گاڑیوں کی نمبر پلیٹ سبز رنگ کی ہی ہوتی ہے، جس سے جرائم پیشہ عناصر باآسانی اپنی شناخت چھپاتے ہوئے وارداتوں کے بعد فرار ہونے میں کامیاب ہو جاتے ہیں۔
شہریوں کا کہنا ہے کہ بعض جرائم پیشہ افراد نے اپنی ذاتی گاڑیوں پر سبز رنگ کی نمبر پلیٹیں لگا رکھی ہیں، جس کے باعث انہیں کوئی روک ٹوک نہیں کی جاتی۔ ٹریفک پولیس اور متعلقہ ادارے ان گاڑیوں کی جانچ پڑتال اور قانونی کارروائی سے اجتناب برت رہے ہیں، جس سے شہر میں مشکوک سرگرمیوں میں اضافہ ہو رہا ہے۔
علاقے کی سماجی تنظیموں اور شہریوں نے ڈسٹرکٹ پولیس آفیسر (ڈی پی او) سے فوری نوٹس لینے اور سبز نمبر پلیٹ والی گاڑیوں کے خلاف مؤثر کارروائی کا مطالبہ کیا ہے تاکہ شہر میں بڑھتے ہوئے جرائم پر قابو پایا جا سکے اور عوام کا تحفظ یقینی بنایا جا سکے۔
