ایس ایل ایس کالج میں عید میلاد النبی ﷺ اور یوم دفاع کی شاندار تقریبات
جہلم: برٹش کونسل کے گولڈ پارٹنر اور ایوارڈ یافتہ ادارے ایس ایل ایس کالج جہلم میں عید میلادالنبی ﷺ اور یومِ دفاع پاکستان کے حوالے سے علیحدہ علیحدہ تقریبات کا انعقاد کیا گیا۔
تقریبات کا آغاز تلاوتِ قرآنِ پاک اور نعتِ رسولِ مقبول ﷺ سے کیا گیا، جس کے بعد وطنِ عزیز کی خاطر جانوں کا نذرانہ پیش کرنے والے شہداء کو زبردست خراجِ عقیدت پیش کیا گیا۔
اس موقع پر مہمانِ خصوصی ڈی ایس پی ٹریفک جہلم خرم فیاض ستی نے خطاب کرتے ہوئے کہا کہ پاکستان کے دفاع و سلامتی کے لیے پوری قوم متحد ہے، اور ٹریفک قوانین کی پابندی ہر شہری کا فرض ہے۔
انہوں نے ایس ایل ایس کالج کے منیجنگ ڈائریکٹر سرفراز ملک کی تعلیمی خدمات کو بھی سراہتے ہوئے کہا کہ یہ ادارہ تعلیم کے ساتھ ساتھ طلبہ میں حب الوطنی کے جذبات کو بھی اجاگر کر رہا ہے۔ انہوں نے مزید کہا کہ جہلم کا یہ ادارہ صرف پاکستان میں ہی نہیں بلکہ بیرون ملک بھی اپنی تعلیمی کامیابیوں اور شاندار نتائج کے باعث پہچانا جاتا ہے۔
منیجنگ ڈائریکٹر سرفراز ملک نے اپنے خطاب میں کہا کہ جہلم کی دھرتی نے ہمیشہ غازی اور شہداء پیدا کیے ہیں۔ انہوں نے کہا کہ 30 فیصد پاک آرمی کا تعلق جہلم سے ہے، اور یہی سرزمین نشانِ حیدر میجر محمد اکرم شہید اور سابق چیف آف آرمی اسٹاف جنرل آصف نواز جنجوعہ سمیت بے شمار شہداء اور غازی پیش کر چکی ہے۔ انہوں نے اس موقع پر جہلم کی تاریخی اور علمی حیثیت پر بھی روشنی ڈالی اور کہا کہ جہلم شرح خواندگی کے لحاظ سے پاکستان کے اولین شہروں میں شامل ہے۔
آخر میں مہمانِ خصوصی ڈی ایس پی خرم فیاض اور منیجنگ ڈائریکٹر سرفراز ملک نے IELTS، A1، B1، کمپیوٹر، گرافک ڈیزائننگ اور اسپوکن انگلش کورسز مکمل کرنے والے طلبہ کو سرٹیفکیٹس تقسیم کیے۔ اس کے ساتھ ہی ایم ڈی ایس ایل ایس نے مہمانِ خصوصی کو یادگاری شیلڈ پیش کی جبکہ صدر چیئرمین یوتھ اسمبلی فار ہیومن رائٹس اور کالمسٹ ڈاکٹر تصور مرزا نے مہمانان کو تحائف پیش کیے۔
یاد رہے کہ ایس ایل ایس کالج جہلم، لاہور اور اسلام آباد کے درمیان واحد IELTS ٹیسٹ سنٹر ہے اور برٹش کونسل کا ضلع جہلم میں واحد B2B گولڈ پارٹنر ادارہ ہے۔ حالیہ برسوں میں اس ادارے کے طلبہ نے پاکستان کی تاریخ میں سب سے زیادہ IELTS بینڈز حاصل کر کے ریکارڈ قائم کیا ہے۔
