ضلع جہلم کو زیرو ویسٹ بنانے کے لیے 15 جنوری سے صفائی مہم شروع ہوگی

ضلع جہلم کو زیرو ویسٹ بنانے کے لیے 15 جنوری سے صفائی مہم شروع ہوگی۔ اس سلسلے میں راولپنڈی ویسٹ مینجمنٹ کمپنی نے اپنا دفتر میونسپل کمیٹی آفس میں قائم کر لیا ہے اور جدید مشینری جلد پہنچنے کی توقع ہے۔

ڈپٹی کمشنر جہلم محمد میثم عباس کی زیر صدارت راولپنڈی ویسٹ مینجمنٹ کمپنی کے افسران کا اجلاس منعقد ہوا، جس میں کمپنی حکام نے منصوبے کی تفصیلات سے آگاہ کیا۔

ڈپٹی کمشنر میثم عباس نے اجلاس سے خطاب کرتے ہوئے کہا شہریوں کو صاف ستھرا ماحول فراہم کرنا پنجاب حکومت کا مشن ہے۔ صفائی کے نظام کو بہتر بنانے کے لیے جدید ترین مشینری استعمال کی جائے گی تاکہ ضلع کو زیرو ویسٹ بنایا جا سکے۔

راولپنڈی ویسٹ مینجمنٹ کمپنی حکام کے مطابق 15 جنوری سے ضلع بھر کی گلیوں اور محلوں سے کچرا اٹھانے کا کام شروع کیا جائے گا جبکہ برسوں پرانے کچرے کے ڈھیروں کو بھی ختم کیا جائے گا۔ ویسٹ مینجمنٹ کمپنی نے میونسپل کمیٹی میں دفتر قائم کرکے مشینری کنٹرول کا انتظام مکمل کر لیا ہے اور مزید مشینری چند دنوں میں پہنچ جائے گی۔

حکومت پنجاب کی ہدایت کے مطابق یہ مہم ضلع بھر کی صفائی اور ماحول کی بہتری کو یقینی بنانے کے لیے شروع کی جا رہی ہے۔ اس اقدام کا مقصد نہ صرف کچرے کو ختم کرنا ہے بلکہ شہریوں کے لیے صحت مند اور صاف ماحول فراہم کرنا بھی ہے۔