سوہاوہ: رمضان سہولت بازار عوامی فلاح کا نمایاں اقدام ہے، ڈپٹی کمشنر جہلم میثم عباس

سوہاوہ: ڈپٹی کمشنر جہلم میثم عباس نے رمضان سہولت بازار سوہاوہ کا دورہ کیا اور بازار میں فراہم کی جانے والی سہولیات کا جائزہ لیا۔

اس موقع پر انہوں نے شہریوں سے ملاقات کی اور حکومت پنجاب کی جانب سے رمضان المبارک میں عوام کو ریلیف فراہم کرنے کے اقدامات کو سراہا۔ انہوں نے کہا کہ رمضان سہولت بازاروں کے قیام سے ضلع بھر میں لاکھوں شہری مستفید ہو رہے ہیں، جو حکومت کے عوام دوست اقدامات کا واضح ثبوت ہے۔

دورے کے دوران اسسٹنٹ کمشنر سوہاوہ افضال نے ڈپٹی کمشنر کو سہولت بازار میں اشیائے ضروریہ کی دستیابی، معیار اور نرخوں کے حوالے سے تفصیلات فراہم کیں۔

ڈپٹی کمشنر نے مختلف اسٹالز کا دورہ کیا اور وہاں موجود اشیائے خورونوش کے معیار اور قیمتوں کا معائنہ کیا۔ انہوں نے بازار میں خریداری کے لیے آئے شہریوں سے بھی سہولت بازار کی سہولیات اور اشیاء کے معیار کے بارے میں دریافت کیا۔

ڈپٹی کمشنر میثم عباس نے واضح ہدایات جاری کرتے ہوئے کہا کہ رمضان سہولت بازاروں میں اشیائے خورونوش کی دستیابی اور معیاری اشیاء کی فراہمی ہر صورت یقینی بنائی جائے۔ انہوں نے متعلقہ حکام کو ہدایت دی کہ قیمتوں کو مستحکم رکھا جائے اور کسی بھی قسم کی گراں فروشی یا ذخیرہ اندوزی کو برداشت نہ کیا جائے۔