ضلع جہلم میں پٹرول پمپ مالکان نے پیمانوں میں کمی کر دی، حکام خاموش

جہلم شہر سمیت چاروں تحصیلوں میں پٹرول پمپ مالکان نےپیمانوں میں کمی کردی، بااثر پمپ مالکان نے پٹرول سستا ہونے پر پیمانہ کم کر دیا۔ پمپ مالکان عوام کو دونوں ہاتھوں سے لوٹنے میں مصروف ہیں۔

تفصیلات کے مطابق جہلم شہرسمیت چاروں تحصیلوں کےعلاقوں میں پٹرول پمپس پر کم پیمانہ میں پٹرول فروخت کیا جا رہا ہے۔ پمپ مالکان نے جب سے پٹرول سستا ہوا ہے، اس کاصارفین کور یلیف دینے کی بجائے مشینوں کے پیمانے کم کر دیئے ہیں۔

ایک لیٹر کی بجائے 700 ملی لیٹر کے قریب پٹرول ڈالا جارہا ہے جبکہ اس بابت اگر پیمائش کی بات کی جائے توملازم لڑائی جھگڑا گالی گلوچ ہاتھا پائی پر اتر آتے ہیں جس وجہ سے بیشتر صارف اپنی عزت بچاتے ہوئے خاموشی کوترجیع دیتے ہیں۔

جہلم شہر کی عوامی اور سماجی تنظیموں کے عمائدین نے ڈپٹی کمشنر سے فوری نوٹس لیتے ہوئے پیمانوں میں ہیرا پھیری کرنے والے مالکان کے خلاف دکانیں سیل کرنے کا مطالبہ کیاہے۔