جہلم میں نامعلوم افراد نے فائرنگ کر کے 68 سالہ شخص کو قتل کر دیا
جہلم میں نامعلوم افراد نے فائرنگ کر کے 68 سالہ موٹرسائیکل سوار شخص کو قتل کر دیا۔
تفصیلات کے مطابق جہلم میں تھانہ صدر کے علاقے ڈھوک برکت چٹی راجگان موڑ پر نامعلوم افراد کی فائرنگ سے 68 سالہ محمد حنیف جٹ سکنہ نئی آبادی بیلا جاں بحق ہوگئے۔ مقتول کی لاش کو پوسٹ مارٹم کے لیے سول اسپتال منتقل کردیا گیا۔
ذرائع کے مطابق محمد حنیف جٹ کی قریبی رشتہ داروں سے دیرینہ دشمنی چل رہی تھی، جس کے نتیجے میں اس سے قبل مقتول کے بیٹے گوگا کو بھی پولیس مقابلے میں ہلاک ہونے والے فیصل پہلوان کے ذریعے مبینہ طور پر قتل کروایا گیا تھا۔
پولیس ذرائع کے مطابق حملہ آوروں نے موقع پر فائرنگ کرکے حنیف جٹ کو قتل کیا اور فرار ہوگئے۔
واقعے کی اطلاع ملتے ہی ایس ایچ او تھانہ صدر پولیس کی بھاری نفری کے ہمراہ موقع پر پہنچے اور شواہد جمع کیے۔
پولیس کا کہنا ہے کہ لاش کو ضروری کارروائی کے بعد ورثا کے حوالے کیا جائے گا۔ پولیس نے واقعے کی تحقیقات کا آغاز کردیا ہے۔
