منگلا ڈیم اور دریائے جہلم میں سیلاب کا کوئی خطرہ نہیں، انچارج کنٹرول روم صبور ثاقب

جہلم/منگلا: انچارج کنٹرول روم منگلا ڈیم صبور ثاقب نے کہا ہے کہ سوشل میڈیا پر منگلا ڈیم اور دریائے جہلم میں ممکنہ سیلاب سے متعلق چلنے والی خبریں بے بنیاد ہیں اور حقیقت سے کوئی تعلق نہیں رکھتیں۔ شہریوں سے اپیل کی گئی ہے کہ سنسنی پھیلانے والوں کی باتوں پر کان نہ دھریں اور ذمہ داری کا مظاہرہ کریں۔

صبور ثاقب کے مطابق اس وقت منگلا ڈیم میں پانی کا انفلو 31,500 کیوسک اور دریائے جہلم میں اخراج بھی 31,000 کیوسک ہے جو معمول کے مطابق ہے۔ منگلا ڈیم میں پانی کی موجودہ سطح 1129 فٹ ہے جبکہ ڈیم میں پانی ذخیرہ کرنے کی مکمل گنجائش 1242 فٹ ہے۔

انچارج کنٹرول روم نے واضح کیا کہ اس وقت منگلا ڈیم یا دریائے جہلم میں کسی قسم کا سیلابی خطرہ موجود نہیں اور پانی کا بہاؤ مکمل طور پر روٹین کے مطابق ہے۔ عوام سے کہا گیا ہے کہ وہ مصدقہ ذرائع سے معلومات حاصل کریں اور افواہوں پر یقین نہ کریں۔

یاد رہے کہ بھارت کی جانب سے آبی جارحیت کا آغاز کر دیا گیا ہے اور بغیر اطلاع دیے دریائے جہلم میں پانی چھوڑا گیا، جس سے مظفرآباد کے علاقے ہٹیاں بالا میں پانی کی سطح میں اضافہ دیکھنے میں آیا ہے۔ تاہم پاکستانی حکام نے تمام صورتحال پر کڑی نظر رکھی ہوئی ہے اور فوری طور پر کسی بھی خطرے کی کوئی اطلاع نہیں دی گئی۔