سوہاوہ میں شہریوں کو گاڑی میں لفٹ دینے کے بہانے لوٹنے والا خواتین ڈکیت گینگ گرفتار

سوہاوہ: تھانہ سوہاوہ پولیس نے شہریوں کو لوٹنے والی فضلاں ڈکیت گینگ کی تین خواتین سمیت 4 افراد کو گرفتار کرلیا، مال مسروقہ برآمد کر لیا گیا۔

تفصیلات کے مطابق دو روز قبل گوجر خان سے رقم لے کر قربانی کا بیل خریدنے کیلئے سوہاوہ آنے والے عمر نامی شہری کو لوٹنے والے فضلاں ڈکیت گینگ کی تین خواتین فضلاں بی بی، شہنار، عاصمہ اور ایک مرد عنصر محمود کو تھانہ سوہاوہ پولیس نے گرفتار کر لیا۔

خواتین ڈکیت گینگ نے عمر نامی شہری کو لفٹ دینے کے بہانے گاڑی میں بٹھایا اور گن پوائنٹ پر رقم چھین لی تھی۔ سوہاوہ پولیس نے ملزمان کے قبضے سے ڈکیتی میں چھینے گئی تین لاکھ روپے نقدی، اسلحہ اور گاڑی برآمد کر لی۔

پولیس کا کہنا ہے کہ ملزمان وارادت کے بعد فرار ہوگئے تھے، جدید سائنٹیفک بنیادوں پر ملزمان کو گرفتار کیا گیا ہے۔

راولپنڈی کے رہائشی خواتین ڈکیت گینگ سادہ لوح شہریوں کو گاڑی میں لفٹ دینے کے بہانے بٹھا کر لوٹی تھیں، ملزمان ڈکیتی کی وارداتوں میں ریکارڈ یافتہ ہیں۔

سوہاوہ پولیس نے ملزمان کو تھانے منتقل کرکے مزید تفتیش شروع کر دی ہے۔