جہلم کے مزدور سوشل سکیورٹی کارڈز سے محروم، علاج معالجہ کی سہولت نہ ہونے پر تشویش
جہلم: ضلع جہلم میں مزدوروں کو تاحال سوشل سکیورٹی کارڈز کی 100 فیصد فراہمی یقینی نہیں بنائی جا سکی۔ موجودہ ترقی یافتہ دور میں بھی بڑی تعداد میں محنت کش بنیادی علاج معالجہ کی سہولت سے محروم ہیں۔
مزدور رہنما حاجی محمد افضل کے مطابق جہلم کے 70 فیصد سے زائد مزدور سوشل سکیورٹی کارڈ نہ ہونے کے باعث سرکاری طبی سہولتوں سے مستفید نہیں ہو پارہے۔
انہوں نے وزیراعلیٰ پنجاب محترمہ مریم نواز شریف سے اپیل کی ہے کہ ضلع جہلم کے مزدوروں کو جلد از جلد سوشل سکیورٹی کارڈ جاری کرنے کے لیے متعلقہ حکام کو سختی سے ہدایات جاری کی جائیں۔
ان کا کہنا تھا کہ سوشل سکیورٹی کارڈز کی عدم دستیابی مزدور طبقے کے لیے کسی المیے سے کم نہیں، جو محنت مزدوری کے ساتھ ساتھ علاج معالجہ سے بھی محروم ہو رہے ہیں۔
محنت کش طبقے نے مطالبہ کیا ہے کہ ان کے بنیادی حقوق کی فراہمی یقینی بنائی جائے تاکہ وہ صحت کی معیاری سہولیات حاصل کر سکیں اور اپنی زندگیاں باعزت طریقے سے گزار سکیں۔
