وزیراعلیٰ پنجاب نے 150 بنیادی مراکز صحت کو آؤٹ سورس کرنے کی منظوری دے دی

جہلم: وزیر اعلیٰ مریم نواز شریف نے دیہی علاقوں میں صحت کی بہتر سہولیات فراہم کرنے کے لیے مریم نواز ہیلتھ کلینکس (MNHC) منصوبے کے تحت صوبے کے تقریباً 150 بنیادی مراکز صحت (BHUs) کو آؤٹ سورس کرنے کی منظوری دے دی ہے۔

محکمہ صحت کے ذرائع کے مطابق راولپنڈی ڈویژن کے چار اضلاع سے 19 بنیادی مراکز صحت کو منتخب کیا گیا ہے۔

موقر انگریزی اخبار کی رپورٹ کے مطابق ضلع راولپنڈی سے 7، جہلم سے 5، چکوال سے 5 اور اٹک سے 2 بنیادی مراکز صحت کو شارٹ لسٹ کیا گیا ہے۔ راولپنڈی ضلع میں جن بنیادی ہیلتھ سنٹرز کو آؤٹ سورس کیا جا رہا ہے ان میں بی ایچ یو بوچیال، بی ایچ یو جنڈ مہلو، بی ایچ یو کولیاں حمید، بی ایچ یو منکیالہ برہمنہ، بی ایچ یو کُری دُلال، بی ایچ یو داخلی اور بی ایچ یو رانوترا شامل ہیں۔

ضلع جہلم میں بی ایچ یو کلونت پور، بی ایچ یو سرگڈھن، بی ایچ یو آڈرانہ، بی ایچ یو بلال ہیلتھ فلٹر کلینک اور بی ایچ یو کوٹلہ فقیر کو آؤٹ سورس کیا جا رہا ہے۔ چکوال ضلع سے منتخب کردہ بی ایچ یوز میں بی ایچ یو ڈھوک مصاحب، بی ایچ یو جھاٹلہ جسوال، بی ایچ یو خیرپور، بی ایچ یو چکرال اور بی ایچ یو میانگاں شامل ہیں۔ اٹک ضلع سے بی ایچ یو خالق آباد اور بی ایچ یو ملہو والا کو وزیر اعلیٰ کے صحت اصلاحات پروگرام کے تحت آؤٹ سورس کیا جا رہا ہے۔

ذرائع کے مطابق وزیر اعلیٰ نے 150 میڈیکل افسران (MOs) اور خواتین میڈیکل افسران (WMOs) کی حتمی منظوری دے دی ہے تاکہ ان آؤٹ سورس کیے گئے بی ایچ یوز کو چلایا جا سکے، جبکہ ان مراکز صحت کے معیار اور معاہدے کی شرائط کی پابندی کو یقینی بنانے کے لیے ماہانہ بنیادوں پر تیسری پارٹی سے جائزہ لیا جائے گا۔

ذرائع نے مزید بتایا کہ یہ آؤٹ سورس کیے گئے مراکز صحت اس وقت غیر فعال تھے، جس کی وجہ انتظامی اور بنیادی ڈھانچے کی کمزوریاں تھیں۔ مزید کہا گیا کہ منصوبے کے تحت مزید بنیادی ہیلتھ سنٹرز کو آؤٹ سورس کرنے کا فیصلہ ان 150 بنیادی مراکز صحت کی کارکردگی کی بنیاد پر کیا جائے گا۔