سوشل میڈیا پر فیک نیوز پھیلانے والوں کے خلاف پنجاب پولیس کا انتباہ

567

جہلم: پنجاب پولیس نے سوشل میڈیا پر بے بنیاد، من گھڑت اور جھوٹی خبریں پھیلانے والے صارفین کے لیے سخت انتباہ جاری کر دیا ہے۔

ترجمان پنجاب پولیس کے مطابق سوشل میڈیا پر کسی بھی فرد یا ادارے کی کردار کشی ایک سنگین اور قابلِ دست اندازی جرم ہے، جبکہ ویورشپ بڑھانے کے لیے فیک نیوز، اے آئی میمز اور جعلی ویڈیوز کا استعمال قانوناً جرم کے زمرے میں آتا ہے۔

ترجمان نے واضح کیا کہ سوشل میڈیا پر غلط یا جھوٹی خبر، مواد کو ری ٹویٹ، فارورڈ یا تشہیر کرنا بھی فیک نیوز پھیلانے کے مترادف ہے۔

انہوں نے بتایا کہ آئینِ پاکستان کا آرٹیکل 19 اگرچہ آزادیٔ اظہارِ رائے دیتا ہے، تاہم یہ آزادی عدلیہ، ریاست، ملکی سلامتی اور سیکیورٹی اداروں کے خلاف ہرزہ سرائی یا کردار کشی کی اجازت نہیں دیتی۔

پنجاب پولیس کے مطابق غیر مصدقہ، من گھڑت اور جھوٹے مواد کی تشہیر پر قانون فوری حرکت میں آئے گا۔ شہریوں کو ہدایت کی گئی ہے کہ وہ سوشل میڈیا پر فیک نیوز، پوسٹس، اے آئی میمز اور ویڈیوز کی اشاعت سے مکمل اجتناب کریں، بصورتِ دیگر ذمہ داران کے خلاف قانونی کارروائی عمل میں لائی جائے گی۔

پنجاب پولیس نے عوام سے اپیل کی ہے کہ ذمہ دارانہ طرزِ عمل اختیار کریں، مستند ذرائع سے تصدیق کے بغیر کسی خبر یا مواد کو شیئر نہ کریں اور معاشرے میں افواہوں کے پھیلاؤ کو روکنے میں قانون نافذ کرنے والے اداروں کا ساتھ دیں۔