پنڈدادنخان میں مخالفین کی فائرنگ سے 2 افراد جاں بحق، ایک شخص زخمی

پنڈدادنخان/ جہلم: پنڈدادنخان میں مخالفین کی فائرنگ سے دو افراد جاں بحق اور ایک شخص زخمی ہو گیا۔

تفصیلات کے مطابق جہلم کی تحصیل پنڈدادنخان کے علاقے ڈھنگوال بس اسٹاپ کے قریب مسلح موٹرسائیکل سواروں نے فائرنگ کر کے دو افراد کو قتل اور ایک شخص کو زخمی کر دیا۔ملزمان موقع سے فرار ہونے میں کامیاب ہو گئے۔

فائرنگ سے جاں بحق ہونے والوں کی شناخت اللہ بخش سکنہ سگھر پور اور جہانزیب سکنہ شاکر پور کے نام سے ہوئی ہے جبکہ زخمی شخص کی شناخت شہزاد کے نام سے ہوئی ہے جو کہ مقتول جہانزیب کا بھائی ہے۔ زخمی کو فوری طور پر تحصیل ہیڈ کوارٹر ہسپتال پنڈدادنخان منتقل کر دیا گیا ہے جہاں اس کی حالت نازک بتائی جا رہی ہے۔

ذرائع کے مطابق فائرنگ کا نشانہ بننے والے افراد ڈی ایس پی آفس انکوائری کے سلسلے میں جا رہے تھے کہ ڈھنگوال بس سٹاپ کے قریب موٹر سائیکل سوار ملزمان نے ان پر اندھا دھند فائرنگ کر دی اور موقع سے فرار ہو گئے۔

واقعہ کے فوری بعد پولیس کی بھاری نفری جائے وقوعہ پر پہنچ گئی جبکہ کرائم سین یونٹ نے شواہد اکٹھے کرنے کا عمل شروع کر دیا ہے۔

پولیس کا کہنا ہے کہ فائرنگ کا یہ واقعہ دیرینہ دشمنی کا شاخسانہ معلوم ہوتا ہے۔ واقعے کی ہر پہلو سے تفتیش کی جا رہی ہے اور ملزمان کو جلد گرفتار کر لیا جائے گا۔