گاڑی اور موٹر سائیکل مالکان کے لئے اہم خبر آگئی

جہلم: حکومتِ پنجاب نے گاڑیوں اور موٹر سائیکلوں کی رجسٹریشن کے نظام میں اہم اور انقلابی تبدیلیوں کا اعلان کر دیا ہے۔

محکمہ ایکسائز اینڈ ٹیکسیشن کے ذرائع کے مطابق اگست 2025 کے پہلے ہفتے سے پنجاب بھر میں نافذ ہونے والے نئے نظام کے تحت، اب تمام رجسٹرڈ گاڑیاں اور موٹر سائیکلیں مالکان کے قومی شناختی کارڈ نمبر سے منسلک کی جائیں گی۔

نئے سسٹم کی نمایاں خصوصیات:

• ہر گاڑی یا موٹر سائیکل کے لیے نمبر پلیٹ اب گاڑی کے بجائے مالک کے نام پر جاری کی جائے گی۔
• گاڑی کی فروخت کی صورت میں پرانی نمبر پلیٹ پرانے مالک کے پاس رہے گی، جبکہ خریدار کو نئی پلیٹ جاری کی جائے گی۔
• شہری اپنی پرانی پلیٹ واپس کر کے نئی پلیٹ بھی حاصل کر سکتے ہیں۔
• اگر کسی کے پاس درست اور مطابقت رکھنے والی پرانی پلیٹ موجود ہو، تو وہ بھی استعمال کی جا سکے گی بشرطیکہ وہ گاڑی کی نوعیت سے میل کھاتی ہو۔

خلاف ورزی پر سخت ایکشن:

حکام نے خبردار کیا ہے کہ:

• اب موٹر سائیکل کی پلیٹ کار پر یا کار کی پلیٹ موٹر سائیکل پر لگانا غیر قانونی ہو گا۔
• خلاف ورزی کی صورت میں 8,000 روپے تک جرمانہ عائد کیا جائے گا۔

محکمہ ایکسائز کے مطابق اس نئے سسٹم کا مقصد جعلی رجسٹریشن، چوری شدہ گاڑیوں کی نقل و حرکت پر قابو پانا اور رجسٹریشن کا عمل زیادہ شفاف اور مؤثر بنانا ہے۔

تمام شہریوں کو ہدایت کی گئی ہے کہ وہ وقت پر اپنی گاڑیوں اور موٹر سائیکلوں کی معلومات اپنے شناختی کارڈ کے ساتھ اپڈیٹ کروائیں تاکہ کسی بھی قسم کی قانونی کارروائی سے بچا جا سکے۔