ڈی پی او جہلم کی پنڈدادنخان میں کھلی کچہری،یتیم بچے کا قبضہ مافیا کے ملزمان کو گرفتار کرنے پر پولیس کو خراج تحسین

پنڈدادنخان: ڈی پی او جہلم ناصر محمود باجوہ کی تحصیل پنڈدادنخان میں کھلی کچہریاں، شہریوں کی شکایات پر فوری کارروائیاں کرنے کا حکم دیا۔ کھیوڑہ میں قبضہ مافیا کے ملزمان کو گرفتار کرنے پر یتیم بچے نے ڈی پی او جہلم اور ایس ایچ او راجہ عثمان تصدق کا شکریہ ادا کیا۔

تفصیلات کے مطابق ڈسٹرکٹ پولیس آفیسر جہلم ناصر محمود باجوہ کی زیر صدارت شہریوں کو بروقت اور فوری انصاف کی فراہمی کے لیے جہلم کی تحصیل پنڈدادنخان کے تھانہ جلالپور شریف، تھانہ پنڈدادنخان اور تھانہ للِہ میں کھلی کچہریوں کا انعقاد کیا جس میں شہریوں نے کثیر تعداد میں شرکت کی۔

ڈی پی او جہلم نے سائلین کے مسائل سنے اور پبلک سروس ڈیلیوری کے معیار کو بہترین بنانے کے لیے سائلین کی درخواستوں پر فوری حل کے احکامات جاری کیے۔

اس موقع پر ڈی پی او ناصر محمود باجوہ کا کہنا تھا کہ عوام کے مسائل کو ترجیحی بنیادوں پر حل کرنے کی کوشش کرتے ہیں اور کھلی کچہریاں اسی سلسلے کی ایک کڑی ہیں جس کے ذریعے عوام کے مسائل کو براہ راست سننے اور حل کرنے میں مدد ملتی ہے۔

شہریوں نے بھی ڈی پی او جہلم کی اس کاوش کو سراہتے ہوئے کہا کہ پولیس کی جانب سے اس طرح کی کھلی کچہریاں عوام کو براہ راست اپنی مشکلات پیش کرنے کا موقع فراہم کرتی ہیں۔

ڈی پی او جہلم نے شہریوں کی شکایات پر کھیوڑہ میں دن کے وقت ہیوی ٹریفک کے داخلے پر پابندی کے احکامات جاری کیے۔

ڈی پی او جہلم ناصر محمود باجوہ نے میڈیا سے گفتگو میں کہا کہ کھلی کچہریوں کے انعقاد کا مقصد دور دراز کے علاقے جہاں کی عوام میرے پاس نہیں پہنچ سکتی انکے مسائل انکی دہلیز پر حل کرنا ہے شہری میرے پرسنل موبائل نمبر پر رابط کر سکتے ہیں۔