عید پر صفائی، صحت اور سیکیورٹی خدمات انجام دینے والا عملہ قوم کا اصل ہیرو ہے، بلال اظہر کیانی

جہلم: وفاقی وزیر مملکت برائے ریلوے و خزانہ بلال اظہر کیانی نے عیدالفطر کے دوسرے روز جہلم کا تفصیلی دورہ کیا۔

انہوں نے ستھرا پنجاب پروگرام کے تحت جاری صفائی آپریشنز، ڈی ایچ کیو ہسپتال، ریسکیو 1122 اور سیف سٹی کنٹرول روم کا معائنہ کیا اور مختلف محکموں کے عملے کی خدمات کو خراجِ تحسین پیش کیا۔ اس موقع پر اسسٹنٹ کمشنر دینہ تیمور خان بھی ان کے ہمراہ تھے۔

دورے کے دوران وفاقی وزیر نے ڈسٹرکٹ ہیڈکوارٹر (ڈی ایچ کیو) ہسپتال جہلم کے مختلف وارڈز اور ایمرجنسی بلاک کا معائنہ کیا۔ انہوں نے زیرِ علاج مریضوں کی عیادت کی، ان کی جلد صحت یابی کے لیے دعا کی اور ہسپتال انتظامیہ کو ہدایت کی کہ ادویات کی بلا تعطل فراہمی اور بہترین طبی سہولیات کو ہر صورت یقینی بنایا جائے۔ انہوں نے عید کے موقع پر ڈیوٹی انجام دینے والے ڈاکٹروں اور پیرا میڈیکل سٹاف کے جذبۂ خدمت کو بھی سراہا۔

وفاقی وزیر بلال اظہر کیانی نے ستھرا پنجاب پروگرام کے تحت شہر میں جاری صفائی ستھرائی کی مہم کا بھی جائزہ لیا اور کہا کہ وزیر اعلیٰ پنجاب کے وژن کے مطابق شہروں کو صاف ستھرا رکھنا حکومت کی اولین ترجیح ہے۔ انہوں نے کہا کہ عید کے دوران بھی فیلڈ میں موجود صفائی عملہ حقیقی معنوں میں قوم کا ہیرو ہے۔ اسسٹنٹ کمشنر دینہ تیمور خان نے انہیں تحصیل میں جاری صفائی آپریشنز اور کوڑا کرکٹ ٹھکانے لگانے کے نظام پر تفصیلی بریفنگ دی۔

دورے کے آخری مرحلے میں وفاقی وزیر نے ریسکیو 1122 اور سیف سٹی کنٹرول روم کا دورہ کیا، جہاں انہوں نے ایمرجنسی سروسز اور ڈیجیٹل نگرانی کے نظام کا جائزہ لیا اور اسے اطمینان بخش قرار دیا۔ انہوں نے انتظامیہ کی پیشہ ورانہ صلاحیتوں کو سراہتے ہوئے کہا کہ حکومت عوام کو ہر سطح پر تحفظ اور ریلیف فراہم کرنے کے لیے پرعزم ہے۔