کرۂ ارض کے عالمی دن کے موقع پر محکمہ صحت و آبادی کے زیر اہتمام شعور بیداری کی تقریب

جہلم: کرۂ ارض کے عالمی دن کے موقع پر ضلعی دفتر محکمہ صحت و آبادی جہلم میں ایک خصوصی تقریب کا انعقاد کیا گیا۔

تقریب کی صدارت ضلعی آفیسر فلائٹ لیفٹیننٹ (ر) حسن خالد وڑائچ نے کی۔ تقریب کا مقصد ماحولیاتی تحفظ، زمینی وسائل کی بقا اور عوام میں ماحول دوستی کے حوالے سے شعور اجاگر کرنا تھا۔

اس موقع پر خطاب کرتے ہوئے حسن خالد وڑائچ نے کہا کہ "ہماری زمین اس وقت ماحولیاتی تبدیلیوں، بڑھتی ہوئی انسانی آبادی اور صنعتی و معاشی سرگرمیوں کے باعث سنگین خطرات سے دوچار ہے۔ اب وقت آ گیا ہے کہ ہم بحیثیت قوم اپنی ذمہ داریوں کا ادراک کریں اور زمین کے تحفظ کے لیے عملی اقدامات اٹھائیں۔”

انہوں نے مزید کہا کہ شہری علاقوں میں آلودگی کے سنگین مسائل جنم لے چکے ہیں، جہاں ہوا میں غیر صحت بخش ذرات کی مقدار میں 20 فیصد اضافہ جبکہ 80 فیصد پانی آلودگی کا شکار ہو چکا ہے۔ انہوں نے پلاسٹک کے بیگز کے بے جا استعمال کو ماحولیاتی تباہی کی ایک بڑی وجہ قرار دیا۔

حسن خالد وڑائچ نے زور دیا کہ "ہمیں چاہیے کہ پلاسٹک کا کم استعمال کریں، شجرکاری کو فروغ دیں اور ماحول کو سرسبز و شاداب رکھنے میں اپنا انفرادی و اجتماعی کردار ادا کریں۔” انہوں نے طلبہ، والدین، اساتذہ اور تمام شعبہ ہائے زندگی سے تعلق رکھنے والے افراد پر زور دیا کہ وہ ماحول دوست سرگرمیوں کو اپنائیں۔

تقریب میں محکمہ صحت و آبادی کے افسران، سول سوسائٹی کے نمائندے، اساتذہ، طلبہ اور دیگر معززین نے شرکت کی اور ماحولیاتی تحفظ سے متعلق آگاہی پمفلٹس بھی تقسیم کیے گئے۔