ضلع جہلم میں آلودگی پھیلانے میں ملوث متعدد بھٹے اور پلانٹس سیل
جہلم/ سوہاوہ: لاہور ہائی کورٹ کے احکامات کے تحت ضلع جہلم میں ماحولیاتی تحفظ کے لیے سخت اقدامات جاری، آلودگی پھیلانے میں ملوث متعدد بھٹے اور پلانٹس سیل کر دیے گئے۔
تفصیلات کے مطابق ضلعی انتظامیہ جہلم کی جانب سے پرانی ٹیکنالوجی پر چلنے والے بھٹہ خشت اور غیر معیاری پلانٹس کے خلاف کارروائیاں جاری ہیں۔ اس سلسلے میں تحصیل سوہاوہ میں پرانی بی ٹی کے ٹیکنالوجی پر چلنے والے تین بھٹہ خشت جن میں وی آئی پی بھٹہ، خان بھٹہ اور شیرازی بھٹہ شامل ہیں کے غیر قانونی ڈھانچے مسمار کر دیے گئے۔
ڈپٹی کمشنر جہلم میثم عباس کی ہدایات پر محکمہ ماحولیات نے پانچ دیگر پلانٹس کا معائنہ بھی کیا، جن میں مٹی اور گرد کو کنٹرول کرنے والے ویٹ اسکربرز نصب نہ ہونے پر ان پلانٹس کو سیل کر دیا گیا۔
ڈپٹی کمشنر میثم عباس نے کہا کہ ماحولیاتی آلودگی کا باعث بننے والے عوامل اور ماحول دوست قوانین کی خلاف ورزی پر سخت کارروائی جاری رکھی جائے گی۔
ان کا کہنا تھا کہ شہریوں کی صحت اور صاف ماحول کو یقینی بنانے کے لیے ماحولیاتی آلودگی کے خلاف ہر ممکن اقدامات کیے جائیں گے۔ ایسی فیکٹریز اور پلانٹس جو ماحول کو نقصان پہنچا رہے ہیں ان کے خلاف فوری ایکشن لیا جائے گا تاکہ مستقبل میں آلودگی پر قابو پایا جا سکے اور شہریوں کو صاف اور محفوظ ماحول فراہم کیا جا سکے۔
