وائلڈ لائف رینجرز جہلم کی کارروائی، دو زندہ پینگولن برآمد، ایک ملزم گرفتار

جہلم: وائلڈ لائف رینجرز جہلم نے گاڑی سے تلاشی کے دوران 2 زندہ پینگولن برآمد کرکے ایک ملزم کو گرفتار کرلیا۔

تفصیلات کے مطابق وائلڈ لائف رینجرز جہلم نے کارروائی کرتے ہوئے ایک مشکوک گاڑی کی تلاشی کے دوران دو زندہ پینگولن برآمد کرکے ایک ملزم کو گرفتار کر لیا۔ کارروائی کے بعد دونوں نایاب جنگلی جانوروں کو آزاد کر دیا گیا۔

ترجمان وائلڈ لائف کے مطابق ڈپٹی چیف وائلڈ لائف رینجر سالٹ رینج سید علی عثمان بخاری کی ہدایت پر اسسٹنٹ چیف وائلڈ لائف رینجر جہلم ارشد ناز نے مشکوک گاڑی کو روک کر تلاشی لی، جس کے دوران دو زندہ پینگولن برآمد ہوئے اور ایک ملزم کو حراست میں لے لیا گیا۔

ترجمان کے مطابق ملزم کے خلاف کارروائی کرتے ہوئے کیس کمپاؤنڈ کر دیا گیا اور اسے 50 ہزار روپے جرمانہ عائد کرکے معاملہ نمٹا دیا گیا، جبکہ ریسکیو کیے گئے دونوں پینگولن کو بعد ازاں آزاد کر دیا گیا۔

وائلڈ لائف حکام کے مطابق پینگولن ایک نایاب جنگلی ممالیہ جانور ہے، جسے عام طور پر آئنٹ ایٹر جبکہ مقامی زبان میں سلاہ بھی کہا جاتا ہے۔ یہ بے ضرر جانور زمین اور درختوں سے دیمک سمیت دیگر کیڑے مکوڑے کھا کر ماحولیاتی نظام میں اہم کردار ادا کرتا ہے۔