جہلم میں چینی کی قیمت میں ایک بار پھر اضافہ کر دیا گیا

جہلم میں چینی کی قیمت میں ایک بار پھر اضافہ کر دیا گیا، جس کے باعث عوامی سطح پر تشویش اور بے چینی بڑھ گئی ہے۔ تازہ اضافے کے بعد چینی تھوک میں 182 روپے فی کلو جبکہ پرچون میں 190 روپے فی کلو تک فروخت ہو رہی ہے۔

چینی کی قیمت میں 5 روپے فی کلو کا اضافہ کیا گیا ہے، جس کے بعد اس کی قیمت 177 روپے سے بڑھ کر 182 روپے فی کلو ہو گئی ہے۔ جہلم شہر کے مضافاتی علاقوں میں صورتحال اس سے بھی زیادہ سنگین ہے جہاں پرچون کی سطح پر چینی 190 روپے فی کلو میں فروخت کی جا رہی ہے۔

شہری حلقوں کا کہنا ہے کہ چینی کی قیمت میں حالیہ دنوں میں جو غیر معمولی اضافہ دیکھنے میں آیا ہے، وہ حکومت کی گرفت سے آزاد دکھائی دیتا ہے۔ پنجاب حکومت کی "قیمت ایپ” پر چینی کے نرخ مقرر نہ ہونے کی وجہ سے دکانداروں کو مکمل آزادی حاصل ہے، جو من مانے نرخ پر چینی فروخت کر رہے ہیں۔

شہریوں نے وزیر اعلیٰ پنجاب مریم نواز شریف سے مطالبہ کیا ہے کہ وہ اس سنگین صورتحال کا نوٹس لیں۔ ان کا کہنا تھا کہ ایک وقت تھا جب چینی 57 روپے فی کلو دستیاب تھی، آج اس کی قیمت میں 125 روپے فی کلو تک اضافہ ہو چکا ہے، جو عام آدمی کی پہنچ سے باہر ہوتا جا رہا ہے۔

عوام نے شوگر مافیا کے خلاف فوری کارروائی اور چینی کی قیمتوں کو کنٹرول کرنے کے لیے ایک واضح اور مؤثر لائحہ عمل ترتیب دینے کا مطالبہ کیا ہے، تاکہ مہنگائی میں کمی لائی جا سکے اور عام آدمی سکھ کا سانس لے سکے۔