پنڈ دادنخان میں اسسٹنٹ کمشنر نے 5 روزہ قومی پولیو مہم کا افتتاح کر دیا
پنڈ دادنخان: اسسٹنٹ کمشنر پنڈ دادنخان نادیہ پروین نے 5 روزہ قومی انسدادِ پولیو مہم کا باقاعدہ آغاز کر دیا۔ انہوں نے بچوں کو پولیو کے قطرے پلا کر مہم کا افتتاح کیا۔
اس موقع پر اسسٹنٹ کمشنر نادیہ پروین نے کہا کہ رواں سال کی پہلی قومی انسدادِ پولیو مہم 3 فروری سے 7 فروری تک جاری رہے گی، جس کے دوران مجموعی طور پر 63,890 بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ انہوں نے مزید بتایا کہ پولیو ٹیموں کی سیکیورٹی کے لیے فول پروف انتظامات کیے گئے ہیں، تاکہ مہم کے دوران کسی قسم کی مشکلات پیش نہ آئیں۔
پولیو مہم کو مؤثر بنانے کے لیے 279 موبائل ٹیمیں، 7 ٹرانزٹ پوائنٹس، 19 فکسڈ سینٹرز، 57 ایریا انچارج ٹیمیں اور 16 یونین کونسلوں میں تربیت یافتہ عملہ تعینات کیا گیا ہے۔ مزید برآں 6,816 بچوں کو اسکولوں میں پولیو کے قطرے پلائے جائیں گے جبکہ پولیو ٹیمیں گھروں، بس و ویگن اڈوں، تعلیمی اداروں اور مراکزِ صحت پر بھی پہنچ کر بچوں کو حفاظتی قطرے پلائیں گی۔
اسسٹنٹ کمشنر نادیہ پروین نے والدین سے اپیل کی کہ وہ 5 سال سے کم عمر تمام بچوں کو پولیو سے بچاؤ کے قطرے ضرور پلوائیں تاکہ ملک کو اس موذی مرض سے پاک کیا جا سکے۔ انہوں نے مزید کہا کہ مہم کے دوران 6,816 خانہ بدوش بچوں کو بھی پولیو ویکسین دی جائے گی تاکہ کوئی بھی بچہ اس مہلک بیماری سے محروم نہ رہے۔
پولیو کے خاتمے کے لیے عوام اور والدین کے تعاون کو ناگزیر قرار دیتے ہوئے انہوں نے تمام متعلقہ اداروں کو ہدایت کی کہ وہ مہم کے دوران اپنی ذمہ داریاں احسن طریقے سے انجام دیں تاکہ مقررہ ہدف کو کامیابی سے مکمل کیا جا سکے۔
